خالد محەممەدی لە گرتووخانەی ئیدارەی ئیتلاعاتی سنە بۆ ژووری تاکەکەسی زیندانی ناوەندیی سەقز گواسترایەوە.
بە پێی ڕاپۆرتی کۆڵبەرنیوز، لە نزیکەی دوو حەوتە لەمەوبەرەوە، خالد محەممەدی، هاووڵاتی خەڵکی گوندی تورجان سەر بە شاری سەقز، لە گرتووخانەی ئیدارەی ئیتلاعاتی سنەوە بۆ ژووری تاکەکەسی زیندانی ناوەندی شاری سەقز گوازراوەتەوە. بە پێی ئەم ڕاپۆرتە، لە ماوەی دەستبەسەرکردنی خالد محەمەدی؛ کالێ حەسەنپوور، هاوسەری دووگیانی ئەم هاووڵاتییە، لەلایەن هێزە ئەمنییەکانی شاری سەقزەوە بانگهێشت و کەوتۆتە بەر لێپرسینەوە و گوشاری دەروونی.
خالد محەمەدی تەمەن ٣٧ ساڵ لە ماوەی ٤٨ ڕۆژی ڕابردوودا کە دەستبەسەر و لە ژێر دەستی هێزە ئەمنییەکاندایە، تەنیا دووجار توانیویەتی لەگەڵ خێزانەکەی پەیوەندی تەلەفونی کورتی هەبێت.
ڕۆژی شەممە ڕێکەوتی ٢٤ی پووشپەڕی ١٤٠٢، دوای زیاتر لە مانگێک دەستبەسەری، خالد محەممەدی لە گرتووخانەی ئیدارەی ئیتلاعاتی سنە بۆ ژووری تاکەکەسی زیندانی ناوەندیی سەقز گوازرایەوە.
هێزە ئەمنییەکان بەبێ دابینکردنی فەرمانی دادگا ئەم هاوڵاتیەیان دەستگیرکردووە و لێپرسینەوەیان لەگەڵدا کردووە. تا ساتی نووسینی ئەم ڕاپۆرتە هیچ زانیارییەک لەبارەی هۆکاری دەستگیرکردن و تۆمەتەکانی ئەم هاوڵاتییە لەبەردەستدا نییە.
