لە ڕووداوێکی هاتوچۆی ئۆتۆمبێلی کۆڵبەراندا لە نزیک پاوە، ٥ کۆڵبەر بە سەختی برینداربوون.
بەپێی زانیاریەکانی کۆڵبەرنیوز، سەرلەبەیانی دووشەمە ٢١ی ڕەشەمەی ١٤٠٢، لە ڕووداوێکی هاتوچۆی ئۆتۆمبێلێکی پژۆ ٤٠٥ و پرایدی کۆڵبەراندا لە ناوچەی چۆڕژی سەر بە نۆسمە لە نزیک پاوە، هەموو سەرنشینانی ئەم دوو ئوتۆمبیلە بە سەختی برینداربوون.
تا کاتی نووسینی هەواڵەکە، تەنها ناسنامەی کۆڵبەرێک بە ناوی «ناسح محەمەدیان» هاوڵاتی سەلاسی باوەجانی بۆ کۆڵبەرنیوز ئاشکرا بووە.
دەگوترێ ٤ کۆڵبەری دیکەش برینداربوون، کە تا ئەم ساتە لە ناسنامەی ئەوان هیچ زانیاریەک بەردەست نییە.
بەپێی ئەو ئامارانەی ٢٠٢٣ لە کۆڵبەرنیوز تۆمارکراون، ٢٩٩ کۆڵبەر لە سنورەکان و ڕێگای نێوان ئازەربایجانی ڕۆژئاوا، کوردستان و کرماشان بە هۆکاری وەک تەقەی ڕاستەوخۆی هێزەکانی ڕژێم، هەرەسی ڕەنوو، بەستەڵەک، کەوتنە سەر مین، کەوتنە خوار لە شاخ، بەرزایی و حاڵەتی دیکە کوژران و بریندار بوون. لەم ژمارەیە ٣٢ کۆڵبەر (١١%) کوژران و ٢٦٧ کۆڵبەر (٨٩%) بریندار بوون. بە گشتی ٢٩٩ کۆڵبەر کە کوژران و بریندار بوون، ٢٦١ حاڵەت (٨٧%) بە تەقەی ڕاستەوخۆی هێزەکان بووە. بە گشتی ٢٩٩ کۆڵبەر کە کوژران و بریندار بوون، ٣٠ لەوانە منداڵی خوار ١٨ ساڵن.
