تا یەک کاتژمێری دیکە لیستی ناوەکانیان بڵاو دەکەینەوە
ئێعدامەکان لە کوردستاندا هێندە خێرایی وەخۆ گرتووە و ماشینی سەرکوتی کۆماری ئیسلامی ئێران هێندە بێ بەزەییانە، گەنجانی ئەم نیشتمانه قوربانی دەکات، وەک ئەوەی پەت و هێزی ڕووتی بەکارهێنابێت بۆ سزادانی بەکۆمەڵی خەڵکی کوردستان و کوشتنی ئازادیی، ئازادبوون، ئازادیخوازیی و ئازادیخوازان. لە دوایین تاواندا، کۆماری ئیسلامی سەر لە بەیانی ئەمڕۆ چوار بەندکراوی سیاسی کوردی لە سێدارەدا.
ئێمە، کۆمەڵێک لە چالاکوانان و ڕێکخراوەکانی مافی مرۆڤ، داوا لە هەموو چین و توێژەکانی کۆمەڵگای کوردستان دەکەین کە لە ڕۆژی سێشەممە، بە بەشداریکردن لە مانگرتنێکی گشتی و سەرتاسەری، ناڕەزایەتی خۆیان بەرامبەر بەم پڕۆسە نامرۆڤانە و دژە مافی مرۆڤە پیشان بدەن.
مەبەست لەم مانگرتنە، وێڕای نیشاندانی دژایەتیی لەسێدارەدان بەگشتیی، ڕاکێشانی سەرنجی نیشتمانیی و نێودەوڵەتی بۆ دۆخی ترسناکی مافی مرۆڤ لە کوردستان و کۆتاییهێنان بە ئێعدامە.
بانگهێشتی هەموو لایەن و حیزبە سیاسییەکان و ڕێکخراوە مەدەنییەکان و دامەزراوەکانی مافی مرۆڤ و ویژدانە بەئاگاکان لە هەموو جیهان دەکەین بۆ پاڵپشتی ئەم مانگرتن و ڕاگەیاندنە کە هەڵسوڕاوانە، دەنگی خەڵکی کوردستان بن لە خەبات بۆ دادپەروەری و مافی مرۆڤ.
٢٩ی ژانویەی ٢٠٢٤، ٩ی ڕێبەندانی ١٤٠٢
