لە بەردەوامی ڕووداوەکانی کارەساتبار بەهۆی نەبوونی ئەمنییەتی شوێنی کار، لانیکەم ١٠ کرێکار لە شارەکانی مەشهەد و بەرخوار بەهۆی کەوتنەخوارەوە لە بەرزایی و گازەوە گیانیان لەدەستداوە.
بەپێی ڕاپۆرتی کۆڵبەرنیوز، کرێکارێک لە باشووری شاری مەشهەد لەکاتی کارکردندا، بەهۆی پابەندنەبوونی ئەمنییەتی لە بەرزایی بۆ ناو چاڵی ئاسانسۆر کەوتەخوارەوە. بەپێی ئەم ڕاپۆرتە، ئەم کرێکارەی تەمەن ٤٦ ساڵ لەکاتی گواستنەوەی کەرەستەی بیناسازی لە نهۆمەکانی خوارەوە بۆ نهۆمەکانی سەرەوە بووە کە تووشی ڕووداو بووە و بەهۆی سەختی برینەکانیەوە، لە شوێنی کارەکەی گیانی لەدەستداوە. هێشتا ناسنامەی ئەم کرێکارە ڕانەگەیەندراوە.
هاوکات، ٩ کرێکاری دیکە بەهۆی ڕووداوێک لە کارگەی پیشەسازی لە شاری بەرخوار لە پارێزگای ئەسفەهان گیانی لەدەستداوە.
مەنسوور شیشەفرۆش، بەڕێوەبەری بەڕێوەبەرێتی قەیرانی پارێزگای ئەسفەهان، ئاگرکەوتنەوەیەکی لە بەشێکی کارگەی ناوچەی پیشەسازی دەوڵەتئاوا ڕاگەیاند؛ ئەم ڕووداوە لە بەیانی دووشەممە ٢٤ سەرماوەز لە بەرهەمهێنانی یەکێک لە بەشەکانی پیشەسازی ڕوویداوە و یەکسەر تیمەکانی ئاگرکوژانەوە و فریاکەوتن گەیشتنە شوێنی ڕووداوەکە.
بەگوتەی ناوبراو، لەم ڕووداوەدا ٩ کرێکار بەهۆی گازەوە گیانیان لەدەستداوە و دۆزینەوەی هۆکاری ئاگرکەوتنەوەکە هێشتا لەلایەن تیمەکانی لێکۆڵینەوە بەردەوامە.
ئەم ڕووداوە لەکاتێکدا ڕوویداوە کە بەپێی ڕاپۆرتەکان، لە ساڵی ١٤٠٣ لانیکەم ٢٠٤٢ کرێکار لە شوێنەکانی کار لە ئێران گیانیان لەدەستداوە و ١٦،١١٣ کرێکار برینداربوون. کارناسان، نەبوونی ئەمنییەتی کاری، چارەنەکردنی بیمەی ناپێویست، کەمی پشکنەرانی کار و لاوازی پێکهاتەکانی ئەمنییەتی، هۆکاری سەرەکی بەردەوامی مردنی کرێکارانە لە شوێنەکانی کاردا.
