موسا ڕەسوڵی و سۆران محەمەدپوور، هاوڵاتییانی دانیشتووی شاری پیرانشار بە دانانی بارمتە لە زیندانی شاری نەغەدە ئازادکران.
بەپێی ڕاپۆرتی کۆڵبەرنیوز، ڕۆژی یەکشەمە ٢٦ی ڕەشەمەی ١٤٠٣، موسا ڕەسوڵی و ڕۆژی سێشەمە ٢٨ی ڕەشەمە سۆران محەمەدپوور، ٢ هاوڵاتی شاری پیرانشار لە زیندانی شاری نەغەدە ئازادکران. بەپێی ئەم ڕاپۆرتە، ئازادی ئەم هاوڵاتییانە بە دانانی بارمتەی ٣ ملیارد تمەن بۆ هەر یەکێکیان ئەنجامدراوە. لەم ڕاپۆرتەدا هاتووە کە ئەم هاوڵاتییانە پاش ٢٠ ڕۆژ لە یەکێک لە گرتووخانە ئەمنییەکان بۆ زیندانی شاری نەغەدە گواسترابوونەوە.
تا کاتی نووسینی ئەم ڕاپۆرتە، لە هۆکارەکانی دەستبەسەری و تۆمەتەکانی دژی ئەم هاوڵاتییانە زانیارییەک لەبەردەستدا نییە.
موسا ڕەسوڵی، تەمەن ٣٠ ساڵ و سۆران محەمەدپوور، تەمەن ٢٥ ساڵ، هاوڵاتییانی شاری پیرانشار ڕۆژی هەینی ٧ی بەفرانباری ١٤٠٣، لەلایەن هێزە ئەمنییەکانەوە دەستبەسەرکران.
