«حامید بیابانی»، گەنجێکی ٢٤ ساڵی خەڵکی شارۆچکەی «سەنقەر»ی سەر بە پارێزگای کرماشان و دانیشتووی تاران، یەکێکە لە گیانبەختکردووانی نارەزایەتییە جەماوەرییەکان لە تاران کە لە کاتی سەرکوتکردنی نارەزایان، بە تەقەی ڕاستەوخۆی گوللەی جەنگی هێزەکانی رژیم کوژرا.
بەپێی ڕاپۆرتی کۆڵبەرنیوز، ئێوارەی پێنجشەممە، ١٨ی بەفرانباری ١٤٠٤، حامید بیابانی، هاووڵاتی خەڵکی شاری سەنقەری سەر بە پارێزگای کرماشان و دانیشتووی شاری پەرەند لە پارێزگای تاران، لە کاتی نارەزایەتییە جەماوەرییەکانی تاران، لە کاتێکدا کە هەوڵی دەدا یارمەتی هاوڕێ برینداربووەکەی بدات، کرایە ئامانجی تەقەی ڕاستەوخۆی سێ گوللەی جەنگی هێزە سەرکوتگەرەکانی کۆماری ئیسلامی و گیانی لەدەستدا. تەرمی ئەم گەنجە کوردە دوای گواستنەوەی بۆ زێدی خۆی، لە شاری «سەنقەر» بەخاکسپێردرا.
ڕادەستکردنی تەرمی گیانبەختکردووانی نارەزایەتییەکان بەزۆری لەگەڵ فشارە ئەمنییەکان و کۆنترۆڵی دامەزراوە حکومییەکاندا دێت و خێزانەکان لە زۆربەی حاڵەتەکاندا لەژێر چاودێری ڕاستەوخۆدان بۆ ئەوەی وردەکارییەکانی مەراسیمەکە، ژمارەی ئامادەبووان و شوێنی بەخاکسپاردن سنووردار بکرێت. ئەم پرۆسەیە وای کردووە کە خێزانەکان زۆرجار ناچار بن بۆ بەخاکسپاردنی خۆشەویستەکانیان ڕێگاکانی تر و ناوچە دەوروبەرەکان هەڵبژێرن.
