سێ چالاکی پیشەیی مامۆستایانی خوزستان بۆ ڕێکەوتی ١٦ی خەزەڵوەری ١٤٠٣ بانگهێشتی لقی ٣ی دادگای شۆڕشی ئەهواز کران.
بەپێی ڕاپۆرتی کۆڵبەرنیوز، بە وتەی شۆرای هەماهەنگیی ڕێکخراوە پیشەییە فەرهەنگیەکانی ئێران، کەوکەب بداقی‌پگا، عەلی کروشات و سادق چەهرازی بە تۆمەتی «گردبوونەوە و پیلانگێڕی لە دژی ئاسایشی نەتەوەیی»، «بانگەشە لە دژی ڕژیم»، «ڕێکخستنی گروپ» و «تێکدانی دۆخی گشتی»، بۆ ڕێکەوتی ١٦ی خەزەڵوەری ١٤٠٣ بانگهيشتی لقی ٣ی دادگای شۆڕشی ئەهواز کراون.
شۆرای هەماهەنگیی ڕێکخراوە پیشەییە فەرهەنگیەکانی ئێران، لە کاردانەوە بە بانگهێشتکردنی چالاکانی پیشەیی مامۆستایانی خوزستان بۆ دادگای شۆڕشی ئەهواز، ڕایگەیاند کە ئەم جۆرە لە تۆمەت هەڵبەستن و گوشار لە دژی چالاکانی پیشەیی، بەتایبەت لە بواری پەروەردە، پێشێلی مافە بنەڕەتی و یاساییەکانی هاوڵاتییانە. هەروەها پشتڕاستی کردەوە کە تۆمەتگەلی وەکوو «گردبوونەوە و پیلانگێڕی لە دژی ئاسایشی نەتەوەیی» و «بانگەشە لە دژی ڕژیم»، کە چالاکانی پیشەیی پێ تاوانبار دەکرێت، هەوڵدان بۆ سەرکوتی دەنگی مافخواز و یاسایی ئەم چالاکانەیە کە تەنیا دەخوازن دۆخی ژیان و پەروەردەی کۆمەڵگە باشتر بێت. هاوکات داوای کۆتایی هێنان بە تۆمەت هەڵبەستنی نادادپەروەردانە لە دژی چالاکانی پیشەیی و بەکارنەهێنانی دادگاکانی شۆڕش بۆ سەرکوتی دەنگی مامۆستایان و کرێکاران دەکەن.
