ئەمیرحوسێین تەعمیرکاری، محەممەدحسێن مورادی و ئەبولفەزڵ پورڕەزایی، سێ هاووڵاتی خەڵکی شاری ئیلام و سەراوڵە، لەم ڕۆژانەی دواییدا بەبێ بڕیاری دادوەر لەلایەن هێزەکانی ڕژیم دەستبەسەر و بۆ شوێنی نادیار گواسترانەوە و تا ئێستا هیچ زانیارییەک لە بارەی دۆخ و چارەنووسیان لەبەردەستدا نییە.
بەپێی ڕاپۆرتی کۆڵبەرنیوز شەممە ١٣ بەفرانبقری ١٤٠٤، محەممەدحسێن مورادی، ٤٠ ساڵ تەمەن و خەڵکی «ئاسمان ئاوا»ی سەر بە سەراوڵە، لەلایەن هێزەکانی ڕژیم دەستبەسەرکراوە. یەکشەممە چواردەی بەفرانباری ١٤٠٤، ئەبولفەزڵ پورڕەزایی، ١٨ ساڵ تەمەن و خەڵکی شاری ئیلام و دووشەممە پازدەی بەفرانباری ١٤٠٤، ئەمیرحسێن تەعمیرکاری، ٢٤ ساڵ تەمەن و خەڵکی شاری ئیلام بەبێ بڕیاری دادوەر لەلایەن هێزەکانی ڕژیم دەستبەسەرکران و بۆ شوێنی نادیار گواسترانەوە.
تاکاتی نووسینی ئەم ڕاپۆرتە، بەرپرسانی ئەمنی و دادوەری کۆماری ئیسلامی لەبارەی هۆکاری دەستبەسەرکران، تۆمەتی دژیان، شوێنی زیندانیکران و دۆخی ئەم سێ هاوڵاتییە وەڵامیان نەداوەتەوە و بەدواداچوونی بنەماڵە و کەسوکاریان تائێستا بێئەنجام ماوە.
