«ئارتین نەدیمی» و «ماردین نەدیمی»، دوو برای دووانە تەمەن ١٩ ساڵ خەڵکی گوندی گازرخانی و دانیشتووی شاری کامیاران، دوای نزیکەی سێ هەفتە لە دەستبەسەرکرانیان، بە شێوەیەکی کاتی لە زیندان ئازاد کران.
بەپێی ڕاپۆرتی کۆڵبەرنیوز، ڕۆژی پێنجشەممە ٩ی ڕێبەندانی ١٤٠٤، ئارتین نەدیمی و ماردین نەدیمی بە دانانی باتمتەی ٥٠٠ ملیۆن تمەن بۆ هەریەکەیان، بە شێوەیەکی کاتی و تا کۆتایی قۆناغەکانی دادگایی، لە زیندانی ناوەندیی سنە ئازاد کران. ئەم دوو هاووڵاتییە دوای دەستبەسەرکرانی سەرەتایی لە کامیاران، سەرەتا لە دەستی دامەزراوە ئەمنییەکانی ئەم شارەدا بوون و دوای دوو ڕۆژ، بۆ ئەنجامدانی لێپرسینەوە بۆ بەڕێوەبەرایەتیی ئیتلاعاتی شاری سنە گواسترابوونەوە.
ئارتین و ماردین نەدیمی ڕۆژی شەممە ٢٠ی بەفرانباری ١٤٠٤، بەبێ بوونی بڕیاری دادوەری لەلایەن هێزە ئەمنییەکانی کۆماری ئیسلامیی ئێرانەوە دەستبەسەر و بۆ شوێنێکی نادیار گواسترابوونەوە. لە ماوەی دەستبەسەرکرانیاندا، خێزانی ئەم دوو برایە لە شوێنی ڕاگرتن، دۆخی جەستەیی و دەروونی و هەروەها تاوانەکانیان بێئاگا بوون.
ئازادکرانی ئەم دوو برایە لە کاتێکدا ڕوویداوە کە دۆسیەی دادگاییان هێشتا کراوەیە و پرۆسەی لێکۆڵینەوە لە تۆمەتە باسکراوەکان بەردەوامە.
