١٠ هاوڵاتیی خەڵکی شاری بۆکان بە ناوەکانی “تەیفور سەلیمی-بابامیری”، “جەلیل مەولودی”، “هێمن کرمانج”، “ئەحمەد مامزادە”، “ئەبوبەکر مامزادە”، “سۆران غەسێمی”، “پژمان سوڵتانی”، “کاوە ساڵحی”، “ڕۆژگار بابامیری”. ” و “جوانمەرد مام خوسرەوی” لە زیندانی “دەریای شار” لە شاری ورمێ لە دۆخێکی نادیاردان.
بە پێی ڕاپۆرتی کۆڵبەرنیوز، ئەم ١٠ هاوڵاتییە لە حەفتەی کۆتایی مانگی خاکەلێوەی ١٤٠٢ بەبێ فەرمانی دادگا لەلایەن کارگێڕی ئیتلاعاتی ورمێ و بۆکان دەستبەسەر کران، ماوەی پێنج مانگیان لە گرتووخانەی کارگێڕی ئیتلاعاتی ورمێ بەسەر برد و لە سەرەتای پاییزەوە بۆ بەندیخانەی دەریای شار لە شاری ورمێ ڕاگوێزران. ئەوە لە کاتێکدا بوو کە وەکوو بەندکراوانی بەندیخانەی شاری بۆکان لە نێو ئامارەکانی بەندکراواندا هەژمار دەکران.
“ئیسماعیل کەرەمەتی”، یەکێک لە کەسوکاری ئەو ١٠ هاوڵاتییە و یەکێکە لە خۆپیشاندەرانی بزووتنەوەی ژینا لە بۆکان، بە کۆڵبەرنیوز دەڵێت: دوای زیاتر لە مانگێک لە
سەرەتاکانی بەندکرانیان، هیچ یەکێک لە بنەماڵەی ئەو بەندکراوانە زانیاریان لەسەر شوێن و چۆنێتی بەندکران و هۆکاری بەندکرانی ئازیزانیان نەبوو، هەروەها هەموو ڕۆژێک دەچونە کارگێڕی ئیتلاعاتی بۆکان، ورمێ و کارگێڕی ئیتلاعاتی سوپا بۆ ئەوەی هەواڵێکیان دەست بکەوێت، بەڵام ئەم کارگێڕیانە هەموویان بێئاگایی خۆیان دەردەبڕی و بەندکردنی ئەو هاوڵاتییانەیان ڕەتکردەوە، تا مانگی جۆزەردان، یەکەمین پەیوەندی لەگەڵ بنەماڵەکەی بە ئامادەیی لێکۆڵەر و بە زمانی فارسی ئەنجامدا، ئەوان ئەوەیان کرد و دەرکەوت کە هەمان شەوی گرتنیان بۆ کارگێڕی ئیتلاعاتی ورمێ ڕاگوازراون.
بە پێی مادەکانی ٤٦ و ١٩٥ی یاسای لێکۆڵینی تاوانکاری ڕژێم، ئەفسەرانی یاسایی و لێکۆڵەران ناچارن لە ماوەی ٤٨ کاژێر دوای گرتنی تۆمەتبار و بەڵگەکانی بۆ تۆمەتبار ڕوون بکەنەوە و بخەنە بەردەم تۆمەتبار.
دوای یەکەم پەیوەندی، بریکارانی کارگێڕی ئیتلاعاتی ورمێ، بنەماڵە و کەسوکاری ئەو بەندکراوانیان بانگهێشت کرد و فەرمانیان پێکردن کە هیچ زانیاریەک سەبارەت بە دۆسیەکە بە میدیاکان نەدەن.
سەرەڕای تێپەڕینی چەند مانگێک بەسەر گرتنیان، ئەو هاوڵاتیانە بەبێ پارێزەرن و لە ژێر ئەشکەنجەدا بوون لە شانەی تاکەکەسی گرتگەی کارگێڕی ئیتلاعاتی ورمێ بۆ دانپێدانانی زۆرەملێ.
سەرچاوەکە دەڵێت: تەیفور سەلیمی-بابامیری بەهۆی ئەشکەنجەی بەردەوام تووشی جەڵتەی مێشک، شکانی قۆڵ و شان، پچڕانی تەپڵی گوێ بووە و زیانێکی زۆر بە هەردوو چاوی گەیشتووە، هەروەها بەندکراوانی دیکە تووشی کێشە و برینداری قورس بوون کە بۆ هیچ میدیایەک باس نەکراون .
بریکارانی دەزگای هەواڵگری ناچاریان کرد بەڵێنی ئازادی و مامەڵەی خێرا لەگەڵ دۆسیەکە بێدەنگ بن و ئێستاش دوای ٩ مانگ لە گرتنیان، ئەم کەسانە هێشتا لە دۆخێکی نادیاردان و هەموو مانگێک فەرمانی گرتنیان درێژ دەکرێتەوە
