سروە پوورمحەمەدی ئەندامی کۆمەڵەی فەرهەنگی و کۆمەڵایەتی “نۆژین” لەلایەن لقی یەکی دادگای ئینقلابی سنەوە بە ١٠ ساڵ زیندان مەحکووم کرا.
بەپێی ڕاپۆرتی کۆڵبەرنیوز، دادگای ئینقلابی سنە بە سەرۆکایەتی دادوەر “کەرەمی” ئەم حوکمەی بۆ خاتوو پورمحەمەدی بە تۆمەتی “دروستکردنی گرووپ و باند” دەرکردووە.
حوکمی زیندانیکردنی ئەم ئەندامەی “نۆژین” ڕۆژی پێنجشەممە ٤ی ڕەزبەر لە ڕێگەی پارێزەرەکانی، جوامێر عەبدوڵڵاهی و هێمن مەجیدی پێی ڕاگەیاندراوە.
جێگای ئاماژەیە کە ڕۆژی دووشەممە ٢٤ی ڕێبەندانی ١٤٠١، سروە پوورمحەممەدی بە دانانی بارمتە تا کۆتایی پرۆسەی دادگا، بەشێوەی کاتی لە ناوەندی چاکسازیی سنە ئازاد کرا.
ڕۆژی یەکشەممە ٩ی ڕێبەندانی ١٤٠١ ئەم هاووڵاتییە لە کاتی بەدواداچوون بۆ دۆخی ئەندامانی دەستبەسەرکراوی کۆمەڵەی فەرهەنگی-کۆمەڵایەتی “نۆژین” لە دادگای ئینقلابی شاری سنە لەلایەن هێزە ئەمنییەکانەوە دەستبەسەر کراوە.
