شەوی هەینی ٨ی پووشپەڕی ١٤٠٣، کۆڵبەرێک بەناوی ”ئومێد مورادی” لە سنووری تەتە، لەلایەن هێزەکانی هەنگی مەرزی لێدان و ئەشکەنجە کرا.
بەپێی ڕاپۆرتی کۆڵبەرنیوز، شەوی هەینی ٨ی پووشپەڕی١٤٠٣، کۆڵبەرێک. بە ناوی ”ئومید مورادی” تەمەن ٤٠ ساڵ، خێزاندار و خاوەنی منداڵێک لەلایەن هێزەکانی هەنگی مەرزی لێدان و ئەشکەنجە کرا.
شایانی باسە هێزەکانی مەرزی بە ”باتۆم” هێرشیان کردۆتە سەر ئەم کۆڵبەرە.
بە پشتبەستن بەو ئامارانەی لە ساڵی ١٤٠٢ی هەتاوی لە کۆڵبەرنیوز تۆمارکراون، بە گشتی ٤٤٤ کۆڵبەر لە ناوچە سنووریەکان و ڕێگاکانی نێوان پارێزگاکانی ئازەربایجانی ڕۆژئاوا، کوردستان و کرماشان بەهۆی هۆکارەکانی وەک تەقەی ڕاستەوخۆی هێزە سەربازییەکانی ڕژیم، ڕنو و سەرمابردوویی، چوونە سەرمین، کەوتنەخوارەوە لە شاخ و بەرزایی، کوژراون و برینداربوون. لەکۆی ئەم ژمارەیە بە گشتی ٤٤ کۆڵبەر کە دەبێتە (١٠%) کوژراون و ٤٠٠ کۆڵبەر کە دەبێتە (٩٠%) برینداربوون. لە کۆی گشتی ٤٤٤ کۆڵبەری کە لە ساڵی ١٤٠٢ کوژران و برینداربوون، بەگشتی ٣٧٣ حاڵەت کە دەبێتە (٨٤%) بەهۆی تەقەی ڕاستەوخۆی هێزە سەربازییەکان بووە.
هەروەها لە کۆی گشتی ٤٤٤ کۆڵبەری کە لە ساڵی ١٤٠٢ لە سنووری کوردستان کوژران و بریندار بوون، ٣٧ کەسیان منداڵی خوار تەمەن ١٨ ساڵن.
لە ساڵی ١٤٠٢دا ئێمە شایەتی بەرزبوونەوەی ٩٠٪ی کوژران و برینداربوونی کۆڵبەران لە سنوورەکانی کوردستان بووین.
