دوو کۆڵبەری خەڵکی شاری پاوە بەهۆی تەقەی ڕاستەوخۆی هێزەکانی هەنگی مەرزییەوە لە سنووری نەوسوود بریندار بوون.
بەپێی ڕاپۆرتی کۆڵبەرنیوز، دوێنێ شەو ٢٧ی سەرماوەزی ١٤٠٢، دوو کۆڵبەر لە هێڵی سنووری نەوسوود بە گوللەی ساچمەیی لەلایەن هێزەکانی هەنگی مەرزییەوە کراونەتە ئامانج و برینداربوون.
ناسنامەی ئەم دوو کۆڵبەرە بە ناوەکانی “ئارمان ئەحمەدی” و “کۆسار پتیام”، هەردووکیان خەڵکی گوندی “دشە” سەربە شاری پاوە ڕاگەیاندراون، کە هەردووکیان ڕان و دەستیان بریندار بووە.
بەپێی ئەم ڕاپۆرته هەردووی ئەم کۆڵبارانه بۆ چارەسەر بۆ نەخۆشخانەی شاری پاوه گوازراونەتەوه.
بەپشتبەستن بەو ئامارەی لە ماوەی دوو مانگی ڕابردوودا لە کۆڵبەرنیوز تۆمارکراوە، لە ١ی ڕەزبەر تا ١ ی سەرماوەزی ١٤٠٢، بەگشتی ١٥٤ کۆڵبەر لە ناوچە سنوورییەکانی کوردستان بەهۆی هۆکارەکانی وەک تەقەی ڕاستەوخۆی هێزەکانی هەنگی مەرزی، لێدان و ئازاردان لەلایەن هێزە سەربازییەکانی ڕژێم و کەوتنە سەر مین. کوژراو و بریندار بوون.
لەم ژمارەیە بەگشتی ٩ کۆڵبەر کوژراون و ١٤٥ کۆڵبەر برینداربوون. لە کۆی گشتی ١٥٤ کۆڵبەر کە کوژراون و برینداربوون، ١٤١ حاڵەت (٩٢%) بەهۆی تەقەی ڕاستەوخۆی هێزە سەربازییەکان بووە.209:53
