بەرەبەیانی ئەمڕۆ یەکشەممە، ٢٤ی بەفرانباری ١٤٠٢، دوابەدوای بەردبارانکردنی کۆڵبەران لەلایەن پاسەوانانی ڕژیم، چەند کۆڵبەرێک لە هێڵی سنووریی نەوسوود بریندار بوون
بەپێی ڕاپۆرتی کۆڵبەرنیوز، پاسەوانانی سنووری ڕژیم لە پردی دوو-ئاو لەسەر ڕێگای نەوسوود بە بەرد هێرشیان کردە سەر ماشێنەکانی کۆڵبەران و لە ئەنجامدا چەندین کۆڵبەر “سەر” یان بریندار بوو. کۆڵبەرانی بریندار دوای چارەسەر، لە نەخۆشخانەی نەوسوود ڕەوانەی نەخۆشخانەی شاری جوانڕۆ کران.
تا ساتی نووسینی ئەم هەواڵە، ناسنامەی دوو کۆڵبەر بۆ کۆڵبەرنیوز پشتڕاستکراوەتەوە و ناوی ئەم کۆڵبەرانە بریتین لە: نەوید و ئارەش. ئەم کۆڵبەرە بریندارانە لە نەخۆشخانەی نەوسوود چارەسەریان بۆ کراوە.
جێگای ئاماژەیە کە بە وتەی شایەتحاڵان، چەندین پاسەوانی سنووری ڕژیم هێرشیان کردووەتە سەر ئۆتۆمبێلەکانی کۆڵبەران بە تابلۆی شاری جوانڕۆ و سەلاس باوەجانی.
بە پشتبەستن بەو ئامارانەی لە ساڵی ٢٠٢٣ی زایینیدا لە کۆڵبەرنیوز تۆمارکراون، بە گشتی ٢٩٩ کۆڵبەر لە ناوچە سنوورییەکان و ڕێگاکانی نێوان جادەکانی پارێزگاکانی ئازەربایجانی ڕۆژئاوا، کوردستان و کرماشان بەهۆی هۆکارەکانی وەک تەقەی ڕاستەوخۆی هێزە نیزامییەکانی ڕژێم، هەرەسی ڕەنوو، بەستەڵەک، کەوتنە سەر مین، کەوتنە خوارەوە لە شاخ و بەرزاییەکان و حاڵەتەکانی ترەوە کوژراون و بریندار بوون. لەم ژمارەیە بەگشتیی ٣٢ کۆڵبەر (١١%) کوژراون و ٢٦٧ کۆڵبەر (٨٩%) بریندار بوون. لە کۆی گشتی ٢٩٩ کۆڵبەری کە کوژراون و بریندار بوون، ٢٦١ حاڵەت (٨٧%) بەهۆی تەقەی ڕاستەوخۆی هێزە سەربازییەکان بووە. لە کۆی گشتی ٢٩٩ کۆڵبەری کە کوژراون و بریندار بوون، ٣٠ کەسیان منداڵی خوار ١٨ ساڵن
