کۆڵبەرێکی خەڵکی داڵاهۆ بەهۆی تەقەی هێزەکانی هەنگی مەرزی لە سنووری نەوسوود بە سەختی برینداربوو.
بەپێی ڕاپۆرتی کۆڵبەرنیوز، شەوی سێشەممە ٢٢ی ڕەشەممەی ١٤٠٢، بەهۆی تەقەی ڕاستەوخۆی هێزەکانی هەنگی مەرزی لە سنووری نەوسوود، کۆڵبەرێک بە سەختی برینداربوو.
ناسنامەی ئەم کۆڵبەرە بریندارە، «تەیمور تەهماسبی» ٣٢ ساڵ تەمەن و خاوەنی ٢ منداڵە و خەڵکی داڵاهۆ سەر بە پارێزگای کرماشان ڕاگەیەندراوە.
ئەم کۆڵبەرە ک لە “ئەنیشک”یدا بە سەختی برینداربووە، بۆ چارەسەر بۆ نەخۆشخانەی “بێستوون”ی کرماشان گوازرایەوە. دەگوترێ کە ناوبراو بۆ دابینکردنی تێچووی نەشتەرگەریەکەی بەهۆی بەرزی نرخەکەیەوە لە ژێر گوشاردایە.
بەپێی ئەو ئامارانەی ٢٠٢٣ لە کۆڵبەرنیوز تۆمارکراون، ٢٩٩ کۆڵبەر لە سنورەکان و ڕێگای نێوان ئازەربایجانی ڕۆژئاوا، کوردستان و کرماشان بە هۆکاری وەک تەقەی ڕاستەوخۆی هێزەکانی ڕژێم، هەرەسی ڕەنوو، بەستەڵەک، کەوتنە سەر مین، کەوتنە خوار لە شاخ، بەرزایی و حاڵەتی دیکە کوژران و بریندار بوون. لەم ژمارەیە ٣٢ کۆڵبەر (١١%) کوژران و ٢٦٧ کۆڵبەر (٨٩%) بریندار بوون. بە گشتی ٢٩٩ کۆڵبەر کە کوژران و بریندار بوون، ٢٦١ حاڵەت (٨٧%) بە تەقەی ڕاستەوخۆی هێزەکان بووە. بە گشتی ٢٩٩ کۆڵبەر کە کوژران و بریندار بوون، ٣٠ لەوانە منداڵی خوار ١٨ ساڵن.
