ئەحمەد مامشەریفی، هاووڵاتیی خەڵکی پیرانشار، دوای نزیکەی ١١ مانگ دەستبەسەرکردن و ڕاگرتنی لە زیندانی ناوەندیی ورمێ، بە دانانی بارمتەی ٣ ملیار تمەن بە شێوەیەکی کاتی ئازاد کرا.
بەپێی ڕاپۆرتی کۆڵبەرنیوز، ئەحمەد مامشەریفی، کوڕی عومەر، خەڵکی گوندی «سێڵوە» و دانیشتووی پیرانشار، لە ڕێکەوتی ٣٠ی جۆزەردانی ١٤٠٤ لەلایەن هێزەکانی ڕژیم دەستبەسەر کرابوو. ناوبراو دوای چەندین مانگ مانەوە لە دۆخی نادیار و بێلایەنی لە زیندانی ناوەندیی ورمێ، بە بڕیاری بارمتەی ٣ ملیار تمەنی ئازاد کرا.
دەستبەسەرکردنی ئەم هاووڵاتییە بەبێ نیشاندانی حوکمی دادوەری و لە ئەنجامی هێرشی هێزەکانی ڕژیم بۆ سەر ماڵی تایبەتیی خۆی بووە. هاوکات لەگەڵ ئەو، سێ هاووڵاتیی تری کوردیش لە پیرانشار دەستبەسەر کرابوون و بنەماڵەکانیان بۆ ماوەیەک لە شوێنی ڕاگرتن و دۆخی دەستبەسەرکراوەکان بێئاگان.
ئەحمەد مامشەریفی لە ماوەی لێپێچینەوەدا لە یەکێک لە گرتووخانەکانی ئەمنی، لە هەبوونی پارێزەر و دیداری بنەماڵەکەی بێبەش کرابوو. دوای تەواوبوونی قۆناغەکانی لێپێچینەوە، گوازرابووەوە بۆ زیندانی ناوەندیی ورمێ و تا کاتی ئازادکردنە کاتییەکەی، بەبێ دیاریکردنی چارەنووسی یاسایی لەو زیندانەدا مابووەوە.
