ئەمیر بابۆلی، هاوڵاتی گوندی «لەج» لە شاری مهاباد بۆ بەسەربردنی سزای ٧ ساڵ بەندکردن دەستگیر کرا و بۆ گرتووخانەی شاری مهاباد گواسترایەوە.
بەپێی ڕاپۆرتی کۆڵبەرنیوز، ڕۆژی پێنجشەممە ١٧ی خەزەڵوەری ١٤٠٣ ئەمیر بابۆلی، هاوڵاتی گوندی «لەج» لە شاری مهاباد بۆ سزای بەندکردنی دەستگیر کرا و بۆ گرتووخانەی مهاباد گواسترایەوە. بەپێی ئەم ڕاپۆرتە ناوبراو لەلایەن لقی ١ی دادگای شۆڕشی مهاباد بەتۆمەتی «ئەندامێتی لە حیزبێکی دژبەری کۆماری ئیسلامی ئێران» و «بانگەشە لە دژی ڕژیم» بە ٦ ساڵ بەندی تەعزیری و لەلایەن لقی ١٠١ی دادگای ٢ی مهاباد بەتۆمەتی «هەڵگرتن و گواستنەوەی چەک» بە ساڵێک بەندی تەعزیری سزادرابوو. بەپێی سەرچاوەیەکی بڕواپێکراو، ئەم هاوڵاتییە لە تۆمەتی «محاربە و افساد فی الارض» بێبەری کرابوو.
ڕۆژی شەممە ٢٥ی پووشپەڕی ١٤٠١ ئەمیر بابۆڵی، بەبێ بڕیاری دادگا لەلایەن هێزە ئەمنییەکانەوە دەستگیرکرا و بۆ لێپرسینەوە بۆ گرتووخانەیەکی ئەمنی ورمێ گواسترایەوە. ڕۆژی یەکشەممە ٢٣ی ڕێبەندانی ١٤٠١ ئەم هاوڵاتییە بە دانانی بارمتەی قورس بە شێوەی کاتی تا کۆتایی دادگاییەکەی لە گرتووخانەی مهاباد ئازاد کرابوو.
