بە تێپەڕبوونی زیاتر لە چوار مانگ بەسەر دەستبەسەرکرانی «ئاسۆ کەیخەسرەوی»، لاوی تەمەن ١٧ ساڵەی خەڵکی جوانڕۆ، هێشتا هیچ زانیارییەک لەسەر شوێنی ڕاگرتن، دۆخی جەستەیی و دۆسیەی یاسایی ناوبراو لەبەر دەستدا نییە و دامەزراوە ئەمنییەکان و دادوەرییەکان لە دانەوەی وەڵامێکی ڕوون بە بنەماڵەکەی خۆیان دەپارێزن.
بەپێی ڕاپۆرتی کۆڵبەرنیوز، ئاسۆ کەیخەسرەوی لە کاتی خۆپیشاندانەکانی شەوی پێنجشەممە ١٨ی بەفرانباری ١٤٠٤ لەلایەن هێزەکانی ڕژیم دەستبەسەر کراوە و بۆ شوێنێکی نادیار گواسترایەوە. سەرەڕای تێپەڕبوونی چەندین مانگ بەسەر کاتی دەستبەسەرکرانیدا، تا ئێستا هیچ زانیارییەکی فەرمی سەبارەت بەو تۆمەتانەی ئاڕاستەی ناوبراو کراون، و لایەنی دەستبەسەرکەر و دادگایی دۆسیەی ئەم لاوە بڵاو نەکراوەتەوە.
بەدواداچوونە بەردەوامەکانی بنەماڵەی ئاسۆ کەیخەسرەوی بۆ ئاگاداربوون لە چارەنووسی کوڕەکەیان تا ئێستا بێئاکام ماوەتەوە و لایەنە بەرپرسەکان وەڵام نادەنەوە. هاوکات، بێبەشکردنی ئەم لاوە لە هەبوونی پارێزەر، پەیوەندیی تەلەفۆنی و چاوپێکەوتن لەگەڵ بنەماڵەکەی، نیگەرانییەکانی سەبارەت بە دۆخی جەستەیی و دەروونیی ناوبراو زیاتر کردووە.
دەستبەسەرکردن و ڕاگرتنی درێژخایەنی کەسەکان، بەتایبەت منداڵان و لاوان، بەبێ مافە سەرەتاییەکانی دادگاییکردن، لەوانە مافی هەبوونی پارێزەر و پەیوەندی لەگەڵ بنەماڵەکەی، پێشێلکردنی ئاشکرای بنەماکانی دادگاییکردنی دادپەروەرانە و بەڵێنە نێودەوڵەتییەکانی کۆماری ئیسلامیی ئێرانە لە هەمبەر مافەکانی منداڵاندا.
