«عەلی شێخی»، هاوڵاتییەکی دانیشتووی دێهلوران سەر بە پارێزگای ئیلام و پاڵەوان و ڕاهێنەری جەستە پەروەری، دوای تێپەڕاندنی ١٦ ڕۆژ دەستبەسەرکران لە یەکێک لە گرتووخانە ئەمنییەکان، بە دانانی بارمتەیەکی قورس بە شێوەیەکی کاتی ئازاد کرا.
بەپێی ڕاپۆرتی کۆڵبەرنیوز، عەلی شێخی دوای ١٦ ڕۆژ ڕاگرتن لە گرتووخانەی ئیلاعاتی سوپای دێهلوران ئازاد کراوە، لەکاتێکدا کە بارودۆخی جەستەیی و دەروونی ناوبراو خراپ ڕاگەیاندراوە و بەهۆی سەختی زیانە گەیشتووەکان، لەژێر چاودێری و چارەسەردایە.
بەپێی زانیارییە بەدەستهاتووەکان، شوێنەوارە ئەشکەنجە جەستەییەکان لە لەشی ئەم ڕاهێنەری جەستە پەروەریدا بە ڕوونی دیارە و ناوبراو لە ئازاری توند لە سکیدا دەناڵێنێت. هەروەها نزیکانی ناوبراو ڕایانگەیاندووە کە عەلی شێخی لە ڕووی دەروونییەوە لە بارودۆخێکی گونجاودا نییە و خێزانەکەی نیگەرانی جدییان لەبارەی بارودۆخی تەندروستی ناوبراوەوە ڕاگەیاندووە.
ئەم هاوڵاتییە لە بەرەبەیانی ڕۆژی چوارشەممە، ١٧ی بەفرانباری ١٤٠٤، نزیکەی کاتژمێر پێنجی بەیانی، لە دوای هێرشێکی توندوتیژانەی هێزە ئەمنییەکانی ئیلاعاتی سوپا بۆ سەر ماڵی خێزانەکەی و بەبێ بوونی بڕیاری دادوەری، لەگەڵ لێدان و ئەشکەنجە دەستبەسەر کرا و بۆ شوێنێکی نادیار گواسترایەوە.
تا ئێستا دامەزراوە ئەمنییەکان هیچ ڕوونکردنەوەیەکی فەرمیان لەبارەی هۆکارەکانی دەستبەسەرکران، تاوانەکانی دژی و بارودۆخی یاسایی ئەم هاوڵاتییەوە ڕانەگەیاندووە.
