سەعدون عەلی پوور و عەلی ئابڕۆشەن، ٢ کرێکاری شارانی مهاباد و شنۆ بەهۆی نەبوونی ئەمنییەت و دۆخی ناجێگیری کار گیانیان لەدەستدا.
بەپێی ڕاپۆرتی کۆڵبەرنیوز پێنجشەمە ١٢ی ڕەزبەری ١٤٠٣ سەعدون عەلیپوور لەکاتی کار لە کێڵگەیەکی پەلەوەردا لە مهاباد بەهۆی کارەباوە گیانی لەدەستدا. ناوبراو خێزاندار و باوکی ٢ منداڵە. بەپێی ڕاپۆرتێکی دیکە چوارشەمە ١١ی ڕەزبەری ١٤٠٣ کرێکارێک بەناوی عەلی ئابڕۆشەن، لەکاتی کار لە بەرزایی کەوتە خوارەوە و گیانی لەدەستدا. ناوبراو خێزاندار و باوکی ٢ منداڵ و خەڵکی شنۆ بوو.
جێی باسە، لە ساڵی ١٤٠٢ لە ڕووداوەکانی کاردا ٢١١٥ کرێکار “٢٠٩٤ پیاو و ٢١ ژن” گیانیان لەدەستداوە. ئەم هەژمارە بە بەراورد بە هەمان ماوەی ساڵی پێشوو کە ژمارەی گیانلەدەستدان ١٩٠٠ کەس بوو، بە ڕێژەی ١١.٣ لە سەد زیادی کردووە.
ئێران لە بواری پابەندبوون بە پرسەکانی سەلامەتی کار لە نێو وڵاتانی جیهاندا لە ڕیزبەندی ١٠٢ دایە، ئەمەش پلەیەکی زۆر نزمە. ئێران یەکێکە لە ناپارێزراوترین وڵاتانە لەبواری پاراستنی کار و ساڵانە ژمارەیەکی زۆر لە کرێکاران بەهۆی نەبوونی پاراستنی کار تووشی ڕووداو دەبن.
