عەبدوڵڵا کەریم گوڵان، هاوڵاتی دانیشتووی سەقز بە تێپەڕینی ١١ ڕۆژ لە دەستگیرکردنی هێشتا دەستبەسەرە و چارەنووسی نادیارە. ناڕوونیی دۆخی ئەم هاوڵاتییە بووەتە هۆی نیگەرانی خێزان و نزیکانی ئەو.
بەپێی ڕاپۆرتی کۆڵبەرنیوز، ڕۆژی دووشەممە ٥ی سەرماوەزی ١٤٠٣ عەبدوڵڵا کەریم گوڵان، مامۆستای ئامادەیی و دانیشتووی سەقز، بە بێ بڕیاری دادگا لەلایەن هێزە ئەمنییەکانەوە دەستگیر کرا و بۆ شوێنێکی نادیار گواسترایەوە. ئەم هاوڵاتییە لەم ماوەیەدا لە مافی هەبوونی پارێزەر و بینینی خێزانەکەی بێبەش بووە و لە کاتی دەستگیریدا تا ئێستا تەنیا پێوەندییەکی کورتی لەگەڵ خێزانەکەیدا هەبووە. بەدواداچوونی کەسوکاری ئەم هاوڵاتییە بۆ زانینی چارەنووسیی، تا ئێستا بێ ئەنجام ماوەتەوە و ئەم بابەتە خێزان و نزیکانی ئەوی نیگەران کردووە.
تا کاتی نووسینی ئەم ڕاپۆرتە زانیارییەک لە هۆکارەکانی دەستگیرکردن و ئەو تۆمەتانەی ئاراستەی ئەم هاوڵاتییە کراون، لەبەردەستدا نییە.
