لەگەڵ تێپەڕبوونی ١٠ ڕۆژ لە دەستبەسەرکرانی «وەحید قەنبەری»، هاوڵاتیی دانیشتووی گەڕەکی “دەرەدرێژ”ی کرماشان، هێشتا هیچ زانیارییەکی ڕوون لەبارەی شوێنی ڕاگرتن و دۆخی ناوبراو لەبەردەستدا نییە و چارەنووسی ئەم هاوڵاتییە لە تاریکییەکی تەواودایە.
بەپێی ڕاپۆرتی کۆڵبەرنیوز لە ڕۆژی ٨ی رێبەندانی ١٤٠٤، هێزە ئەمنییەکان بەبێ بوونی بڕیاری دادوەری، وەحید قەنبەری لە گەڕەکی “دووشمیان”ی سەر بە داڵاهۆ دەستبەسەر کرا و بۆ شوێنێکی نادیار گواسترایەوە.
بەپێی زانیارییە بەدەستهاتووەکان، ئەم هاوڵاتییە دوای دەستبەسەرکران بۆ ئەنجامدانی لێپرسینەوە بۆ یەکێک لە گرتووخانە ئەمنییەکانی کرماشان گواستراوەتەوە و لە کاتی دەستبەسەرکرانییەوە تا ئێستا لە مافی دەستڕاگەیشتن بە پارێزەر و چاوپێکەوتن لەگەڵ خێزانەکەی بێبەش کراوە.
تا کاتی ئامادەکردنی ئەم ڕاپۆرتە، دامەزراوە ئەمنییەکان هیچ ڕوونکردنەوەیەکیان لەبارەی هۆکارەکانی دەستبەسەرکران و تۆمەتەکانی دژی بە وەحید قەنبەری ڕانەگەیاندووە و بەردەوامی بێهەواڵی، بووەتە هۆی نیگەرانیی خێزان و نزیکانی ئەم هاوڵاتییە.
