تەرمی دوو کۆڵبەری خەڵکی شاری سەقز بە ناوی ئەفشین فەلاحی و مەهدی ڕەحیمی، کە لە بەنداوی عەباساوای بانە نوقم ببوون، پاش ٩ ڕۆژ دۆزرانەوە.
![](https://ku.kolbarnews.com/wp-content/uploads/2023/04/دۆزینەوەی-تەرمی-دوو-کۆڵبەری-خەڵکی-سەقز-لە-بەنداوی-عەباساوای-بانە-پاش-٩-ڕۆژ.jpg)
بەپێی ڕاپۆرتی گەیشتوو بە کۆڵبەر نیوز؛ ڕۆژی شەممە، ٢۶ی خاکەلێوەی ٢٧٢٣ (١۵ی ئەپریلی ٢٠٢٣)، تەرمی دوو کۆڵبەری خەڵکی شاری سەقز بە ناوەکانی ئەفشین فەلاحی، تەمەن ٢٢ ساڵ و مەهدی ڕەحیمی، تەمەن ٢٣ ساڵ، لەلایەن تیمێکی فەریاکەوتن لە بەنداوی عەباساوای بانە دۆزراونەتەوە.
تەرمی ئەو دوو لاوە پاش ٩ ڕۆژ نوقمبوون و بەردەوامیی هەوڵی تیمەکانی فریاکەوتنی شاری بانە، سەقز، مەریوان و سنە بۆ دۆزینەوەیان، سەرلەبەیانیی ئەمڕۆ دۆزراونەتەوە.
ئەو دوو کۆڵبەرە خەڵکی شاری سەقز بوون و ڕۆژی پێنجشەممە، ١٧ی خاکەلێوەی ٢٧٢٣ (۶ی ئەپریلی ٢٠٢٣) لە بەنداوی عەباساوای بانە نوقم بوون.