ڕۆژی شه‌ممه ٩ی مانگی گوڵان، چوار چالاكی كرێكاری و دوو چالاكی مه‌ده‌نی شاری بانه بانگهێشتی لقی ١٠١ی دادگای كه‌یفه‌ری ئه‌و شاره كراون.
به‌پێی ڕاپۆرته‌كان، چوار چالاكی كرێكاری به‌ناوه‌كانی “په‌روین عه‌بدۆڵڵاپوور”، “سه‌عید محه‌ممه‌دی”، “عومه‌ر سوله‌یمانی” و “سولیه‌مان فاتحی” بانگهێشتی لقی ١٠١ی دادگای كه‌یفه‌ری بانه كراون و ئه‌بێ ڕۆژی ٢٠ی گوڵان سه‌باره‌ت به تۆمه‌ته‌كانی “هاوكاری له‌گه‌ڵ یه‌كێك له حیزبه نه‌یاره‌كانی ڕژیم” و “ته‌بلیغ دژی نیزام” به‌رگری له خۆیان بكه‌ن. شایانی باسه كه ئه‌و چوار چالاكه كرێكاریه ڕۆژی ٢٨ جۆزه‌ردانی ساڵی ڕابردوو به‌دانانی وه‌سیقه‌ی ٣٠٠ ملیۆن تمه‌نی له زیندانه‌كانی سنه و بانه ئازاد كرابوون. له‌لایه‌كی دیكه‌وه دوو چالاكی مه‌ده‌نی ئه‌و شاره به‌ناوه‌كانی “ڕێبوار تالبی” و “محه‌ممه‌د شه‌ریف بایه‌نده” هه‌ر به‌و تۆمه‌تانه‌ی خراوه‌ته پاڵ دۆسیه‌ی ئه‌و چوار چالاكه كرێكاریه بانگهێشتی لقی ١٠١ی دادگای بانه كراون. جێگای ئاماژه‌یه كه ئه‌و دوو هاووڵاتیه له ڕێكه‌وتی ٣٠ی پووشپه‌ڕی ساڵی پار له‌لایه‌ن ئیداره‌ی ئیتلاعاته‌وه ده‌ستبه‌سه‌ر و ڕاگوێزی گرتووخانه‌ی ئه‌و ناوه‌نده ئه‌منیه‌تیه له سنه كرابوون.
