کۆڵبەرێکی خەڵکی شاری “سنە” لە هێڵی سنووری “هەنگەژاڵ” بەهۆی لێدان و ئازاردانی لەلایەن هێزەکانی هەنگی مەرزییەوە بریندار بوو.
بەپێی ڕاپۆرتی کۆڵبەرنیوز، ڕۆژی سێشەممە ٢٦ی بەفرانباری ١٤٠٢، هێزەکانی ڕژیم لە هێڵی سنووری هەنگەژاڵ کۆلبەرێکیان داوەتە بەر ئازار و عەزیەت و لێدان، کە لە ئەنجامدا شان و پشت و ملی ئەم کۆڵبەرە برینداربووە.
بەپێی ئەم ڕاپۆرته ناسنامەی ئەم کۆڵبەرە “سەباح ئەحمەدیان” خەڵکی شاری سنه ڕاگەیاندراوە. جێگای ئاماژەیە کە لە هەمان کاتدا هێزەکانی هەنگی مەرزی لە دوو کۆڵبەری دیکەشیان داوە، کە تا ئێستا پێگە و ناسنامەیان بۆ کۆلبەرنیوز ئاشکرا نەبووە.
بە پشتبەستن بەو ئامارانەی لە ساڵی ٢٠٢٣ی زایینیدا لە کۆڵبەرنیوز تۆمارکراون، بە گشتی ٢٩٩ کۆڵبەر لە ناوچە سنوورییەکان و ڕێگاکانی نێوان جادەکانی پارێزگاکانی ئازەربایجانی ڕۆژئاوا، کوردستان و کرماشان بەهۆی هۆکارەکانی وەک تەقەی ڕاستەوخۆی هێزە نیزامییەکانی ڕژێم، هەرەسی ڕەنوو، بەستەڵەک، کەوتنە سەر مین، کەوتنە خوارەوە لە شاخ و بەرزاییەکان و حاڵەتەکانی ترەوە کوژراون و بریندار بوون. لەم ژمارەیە بەگشتیی ٣٢ کۆڵبەر (١١%) کوژراون و ٢٦٧ کۆڵبەر (٨٩%) بریندار بوون. لە کۆی گشتی ٢٩٩ کۆڵبەری کە کوژراون و بریندار بوون، ٢٦١ حاڵەت (٨٧%) بەهۆی تەقەی ڕاستەوخۆی هێزە سەربازییەکان بووە. لە کۆی گشتی ٢٩٩ کۆڵبەری کە کوژراون و بریندار بوون، ٣٠ کەسیان منداڵی خوار ١٨ ساڵن .
