کۆڵبەرێکی خەڵکی مەریوان بە تەقەی ڕاستەوخۆی هێزەکانی هەنگی مەرزی، لە هێڵی سنووری شاری مەریوان برینداربوو.
بەپێی ڕاپۆرتی کۆڵبەرنیوز، ئێوارەی چوارشەممە ٢٣ی ڕەشەممەی ١٤٠٢، بەهۆی تەقەی ڕاستەوخۆی هێزەکانی هەنگی مەرزی لە هێڵی سنووری هەنجیران لە مەریوان، کۆڵبەرێک برینداربوو. ناسنامەی کۆڵبەرە بریندارەکە «ئالان محەمەدی» هاوڵاتی شاری مەریوان ڕاگەیندراوە.
بەپێی هەواڵەکە، ناوبراو بەهۆی سەختی برینەکەی، بە فریاگوزاری ئاسمانی بۆ نەخۆشخانەی بەعسەتی سنە گوازرایەوە.
بەپێی ئەو ئامارانەی ٢٠٢٣ لە کۆڵبەرنیوز تۆمارکراون، ٢٩٩ کۆڵبەر لە سنورەکان و ڕێگای نێوان ئازەربایجانی ڕۆژئاوا، کوردستان و کرماشان بە هۆکاری وەک تەقەی ڕاستەوخۆی هێزەکانی ڕژێم، هەرەسی ڕەنوو، بەستەڵەک، کەوتنە سەر مین، کەوتنە خوار لە شاخ، بەرزایی و حاڵەتی دیکە کوژران و بریندار بوون. لەم ژمارەیە ٣٢ کۆڵبەر (١١%) کوژران و ٢٦٧ کۆڵبەر (٨٩%) بریندار بوون. بە گشتی ٢٩٩ کۆڵبەر کە کوژران و بریندار بوون، ٢٦١ حاڵەت (٨٧%) بە تەقەی ڕاستەوخۆی هێزەکان بووە. بە گشتی ٢٩٩ کۆڵبەر کە کوژران و بریندار بوون، ٣٠ لەوانە منداڵی خوار ١٨ ساڵن.
