ئەکرەم، کۆسار، فەرشاد، فەردین و ئیحسان ڕۆستەمنەژاد، پێنج برای کۆڵبەری خەڵکی گوندی شمشێر، سەر بە شاری پاوە، لە ماوەی دوو ساڵی ڕابردوودا بە تەقەی هێزەکانی هەنگی مەرزی لە سنوری نەوسود بریندار بوون.
بە پێی ڕاپۆرتی کۆڵبەرنیوز، لە دوو ساڵی ڕابردوو، ئەکرەم، کۆسار، فەرشاد، فەردین و ئیحسان ڕۆستەمنەژاد، پێنج برای خەڵکی گوندی شمشێر سەر بە شاری پاوە، بە تەقەی ڕاستەوخۆ و لە ئەنجامی ڕاوەدوونانی هێزەکانی هەنگی مەرزی لەسەر سنووری نەوسود بریندار بوون.
بە پێی ڕاپۆرتی کۆڵبەرنیوز، چوارشەممە ٢٢ گوڵانی ١٤٠٠، ئەکرەم ڕۆستەمنەژاد کۆڵبەر خەڵکی گوندی شمشێر سەر بە شاری پاوە، لە کاتی ڕاوەدوونانی هێزەکانی هەنگی مەرزی لە شاخ کەوتە خوارەوە و بریندار بوو.
هەروەها ئێوارەی هەینی، ١٣ ڕێبەندانی ١٤٠٢، هێزەکانی هەنگی مەرزی تەقەیان لە کۆمەڵێک کۆڵبەر لەسەر سنووری نەوسود کرد و کۆڵبەرێک بریندار بوو.
ناسنامەی کۆڵبەرە بریندارەکە “کۆسار ڕۆستەمنژاد” خەڵکی گوندی شمشێر لە شاری پاوەیە. بە پێی ڕاپۆرتەکە، ناوبراو سەری بریندار بووە و بە هۆی سەختی برینەوە بۆ نەخۆشخانەی تاڵەقانی کرماشان گواسترایەوە. پێشتریش لە ٢٢ گوڵانی ١٤٠٠، کۆسار ڕۆستەمنەژاد لەگەڵ ئەکرەم ڕۆستەمنەژاد، بە تەقەی ڕاستەوخۆی هێزەکانی هەنگی مەرزی لە سنوری نەوسود بریندار بوون.
کۆسار ڕۆستەمنەژاد خێزاندارە و خاوەنی یەک منداڵە.
فەردین ڕۆستەمنەژاد، کۆڵبەری تەمەن ٢٦ ساڵ، خێزاندار و خاوەنی یەک منداڵ، دووشەممە ٨ ڕەشەمەی ١٤٠١، لە سنوری کەڵەبەر – نەوسود، بە تەقەی ڕاستەوخۆی هێزەکانی هەنگی مەرزی تووشی پصڕانی دڕکەپەتک بووە و توانای بەپێ ڕۆیشتنی بۆ هەمیشە لەدەست داوە.
هەروەها، ئێوارەی سێشەممە ١٩ بەفرانباری ١٤٠٢، هێزەکانی هەنگی مەرزی بە دەمانچە تەقەیان لە کۆمەڵێک کۆڵبەر لە سنووری نەوسود کرد و کۆڵبەرێک بە سەختی بریندار بووە. ناسنامەی کۆڵبەرەکە “فەرشاد ڕۆستەمنەژاد”، ٣٣ ساڵ و دانیشتووی گوندی شەمشیر لە شاری پاوەیە.
بەپێی هەواڵی گەیشتوو بە کۆڵبەرنیوز، ئیحسان ڕۆستەمنەژاد، برای ئەو چوار کۆڵبەرە ناوبراوەی سەرەوە، لە دوو ساڵی ڕابردوودا بە تەقەی ڕاستەوخۆی هێزەکانی هەنگی مەرزی لە سنوری نەوسود بریندار بووە.
