کۆڵبەرێک بەهۆی تەقەی ڕاستەوخۆی هێزەکانی هەنگی مەرزی لە هێڵی سنووری نەوسوود برینداربوو. جەستەی ئەم کۆڵبەرە بە زیاتر لە ٥٠ گوللەی ساچمەیی کراوەتە ئامانج.
بەپێی ڕاپۆرتی کۆڵبەرنیوز، ئێوارەی هەینی ١٨ی ڕەشەممەی ١٤٠٢، هێزەکانی هەنگی مەرزی لە هێڵی سنووری نەوسوود بە چەکی ساچمەیی بە بەرەو کۆڵبەرێک تەقەیان کرد و ئەویان بە سەختی بریندارکرد. ناسنامەی کۆڵبەرە بریندارەکە «فایەق بەهنیا» یە و خەڵکی شاری سەقزە.
بەپێی ڕاپۆرتەکە، هێزەکانی هەنگی مەرزی بە چەکی ساچمەیی و تەقەی ڕاستەوخۆ ئەم کۆڵبەرەیان کردۆتە ئامانج و بەپێی ڕاپۆرتی پزیشکی، زیاتر لە ٥٠ گوللەی ساچمەیی بە لای چەپی ئەم کۆڵبەرەوە بووە.
بەپێی ئەو ئامارانەی ٢٠٢٣ لە کۆڵبەرنیوز تۆمارکراون، ٢٩٩ کۆڵبەر لە سنورەکان و ڕێگای نێوان ئازەربایجانی ڕۆژئاوا، کوردستان و کرماشان بە هۆکاری وەک تەقەی ڕاستەوخۆی هێزەکانی ڕژێم، هەرەسی ڕەنوو، بەستەڵەک، کەوتنە سەر مین، کەوتنە خوار لە شاخ، بەرزایی و حاڵەتی دیکە کوژران و بریندار بوون. لەم ژمارەیە ٣٢ کۆڵبەر (١١%) کوژران و ٢٦٧ کۆڵبەر (٨٩%) بریندار بوون. بە گشتی ٢٩٩ کۆڵبەر کە کوژران و بریندار بوون، ٢٦١ حاڵەت (٨٧%) بە تەقەی ڕاستەوخۆی هێزەکان بووە. بە گشتی ٢٩٩ کۆڵبەر کە کوژران و بریندار بوون، ٣٠ لەوانە منداڵی خوار ١٨ ساڵن.
