لە ناڕەزایەتییەکانی سەرتاسەرییدا، لانیکەم ١٦ هاووڵاتی لە پارێزگاکانی کرماشان، ئیلام و تاران لەلایەن هێزەکانی ڕژیم دەستبەسەرکرا و بۆ شوێنێکی نادیار گوازرانەوە.
بەپێی ڕاپۆرتی کۆڵبەرنیوز، ئیمان عەلیمورادی، عەلی نەجەفی، محەمەد حەسەنوەند، بیژەن کەریمیان، محەمەد جەواد زارعی، ئەکبەر دەروێشی، عارف دەروێشی، محەمەد هەواسی، سپێهر ساڵحی، ئەمیر ڕەئوفی، ئیحسان مەلەکی، میلاد کیادی، فەرزاد شوکری، ئەبولفەزڵ شادفەر، موعین مەلەکی، و یەزدان بەختی ئەو هاوڵاتیانەن لە چەند ڕۆژی ڕابردوودا لەلایەن هێزەکانی ڕژیم دەستبەسەرکراون.
بەپێی زانیارییەکان، ئیمان عەلیمورادی لەلایەن هێزەکانی ڕژیم لە تاران و عەلی نەجەفی لە کرماشان دەستبەسەرکراون. هەروەها محەمەد جەواد زارعی، هاوڵاتیەکی خەڵکی مورمور لە ئاودانان، لەگەڵ محەمەد حەسەنوەند، تەمەن ٢١ ساڵ و بیژەن کەریمیان، تەمەن ٢١ ساڵ، هاوڵاتیانی خەڵکی درەشار لە پارێزگای ئیلام، ڕۆژی پێنجشەممە ١١ی بەفرانباری ١٤٠٤ دەستبەسەرکران.
لەلایەکی دیکەوە، ئەکبەر دەروێشی، عارف دەروێشی، محەمەد هەواسی، سپێهر ساڵحی، ئەمیر ڕەئوفی، ئیحسان مەلەکی، میلاد کیادی، فەرزاد شوکری، ئەبولفەزل شادفەر، موعین مەلەکی، و یەزدان بەختی کە هەموویان هاوڵاتیانی خەڵکی شاری دێلوران لە پارێزگای ئیلامن، لە ١٠ی بەفرانباری ١٤٠٤، لەلایەن هێزەکانی ڕژیم لەم شارە دەستبەسەرکران.
بەپێی ڕاپۆرتی کۆڵبەرنیوز، ئەم هاوڵاتیانە بەهۆی ناڕەزایەتییەکانی ئەم دواییەی پارێزگاکانی تاران، کرماشان و ئیلام دەستبەسەرکراون.
تاکاتی نووسینی ئەم هەواڵە شوێنی زیندانیی، دۆخی جەستەیی و تۆمەتەکانی دژی ئەم هاوڵاتیانە نادیارە.
ناڕەزایەتییەکانی جەماوەری لە ڕۆژی یەکشەممە ٧ی بەفرانباری ١٤٠٤، بە مانگرتنی دووکانداران لە تاران دەستی پێکرد، تا ئێستاش بەردەوامن و بەپێی ڕاپۆرتەکان لانیکەم لە ٣٢ شاری پارێزگاکانی وڵاتدا بڵاوبوونەتەوە.
