ڕامین زەلە و کەریم مەعرووفپوور، دوو زیندانیی سیاسیی کوردی خەڵکی شاری نەغەدە کە لە دۆسیەیەکی هاوبەشدا سزای سێدارەیان بەسەردا سەپابوو، بەبێ ئاگادارکردنەوەی بنەماڵەکانیان و بەبێ مافی دوایین دیدار، لەسێدارە دران.
بەپێی ڕاپۆرتی کۆڵبەرنیوز، بەرەبەیانی پێنجشەممە ٣١ی گوڵانی ١٤٠٥، سزای سێدارەی ڕامین زەلە و کەریم مەعرووفپوور لە زیندانی ناوەندیی نەغەدە بە شێوەیەکی نهێنی جێبەجێ کرا. ئەم دوو زیندانییە سیاسییە پێشتر بە تۆمەتی ئەندامێتی لە حیزبی دێموکراتی کوردستانی ئێراندا سزای سێدارەیان بەسەردا سەپابوو.
هاوکات لەگەڵ جێبەجێکردنی سزاکەیان، ناوەندی ڕاگەیاندنی دەسەڵاتی دادوەری بە بڵاوکردنەوەی ڕاگەیەندراوێک، جێبەجێکردنی سێدارەی ئەم دوو زیندانییەی پشتڕاست کردەوە و تۆمەتەکانی ئەوانی بە «ئەندامێتی لە گرووپە تیرۆریستییە جیاوازیخوازەکان، ڕاپەڕینی چەکدارانە و هەوڵی تیرۆر» ناو برد. لە بەرامبەردا، ناوەندەکانی مافی مرۆڤ و سەرچاوەکانی نزیک لە دۆسیەکە ڕایانگەیاندووە کە ئەم جۆرە تۆمەتانە لە دۆسیە سیاسییەکاندا، بەتایبەت لە کوردستان، چەندین جار لە بارودۆخێکدا خراونەتە ڕوو کە ڕاپۆرتەکانی وەرگرتنی دانپێدانانی زۆرەملێ لەژێر گوشاردا و نەبوونی دەستڕاگەیشتنی کاریگەر بە مافەکانی بەرگری بڵاوکراوەتەوە.
ڕامین زەلە، زیندانیی سیاسیی کوردی خەڵکی نەغەدە، ڕۆژی ١ی گەلاوێژی ١٤٠٣ لەلایەن هێزەکانی ئیدارەی ئیتلاعاتەوە دەستبەسەر کرا و دوای گواستنەوەی بۆ زیندانی ناوەندیی نەغەدە، زیندانیکرا. ناوبراو دوای تێپەڕاندنی ٥٠٧ ڕۆژ لە دەستبەسەری و نادیاریی چارهنووسیدا، لەلایەن لقی یەکەمی دادگای شۆڕشی مەهابادەوە بە سەرۆکایەتی دادوەر سیامی، بە تۆمەتی «بەغی» لە ڕێگەی ئەندامێتی لە حیزبی دێموکراتی کوردستانی ئێراندا بە سێدارە سزا درا.
بەپێی زانیارییە بەردەستەکان، دانیشتنی ڕاگرتنی دۆسیەی ڕامین زەلە دوای چەندین مانگ ڕاگرتنی لە بارودۆخی سنوورداردا، تەنیا لە چەند خولەکێکدا بەڕێوەچووە و ناوبراو لە ڕەوتی دادگاییکردنەکەدا پارێزەری خۆی نەبینیووە. سزای سێدارەکەشی لە ١٥ی سەرماوەزی ١٤٠٤ بە شێوەیەکی فەرمی لە زینداندا پێی ڕاگەیێندرابوو.
کەریم مەعرووفپوور، تەمەن ٢٩ ساڵ و خەڵکی نەغەدە، پێشتر لە ٣ی خاکەلێوەی ١٤٠٠ لەلایەن هێزەکانی ڕژیم لە شاری سەردەشت دەستبەسەر کرابوو. بەپێی ڕاپۆرتە بڵاوکراوەکان، ناوبراو لە کاتی دەستبەسەرکردنیدا لێدان و ئەشکەنجە کراوە و پاشان بۆ ماوەیەکی درێژخایەن لە بارودۆخی پچڕانی پەیوەندی لەگەڵ بنەماڵەکەیدا ڕاگیراوە.
کەریم مەعرووفپوور لە درێژەی ڕەوتی ڕاگرتنی دادوەریدا، لە دۆسیەیەکی هاوبەشدا لەگەڵ ڕامین زەلە لەلایەن دادگای شۆڕشی مەهابادەوە سزای سێدارەی بەسەردا سەپا.
تا کاتی ئامادەکردنی ئەم ڕاپۆرتە، زانیاریی زیاتر لەسەر وردەکارییەکانی جێبەجێکردنی سزاکەیان، چۆنیەتی ئاگادارکردنەوەی بنەماڵەکانیان و ڕەوتی ڕادەستکردنەوەی تەرمەکان بڵاو نەکراوەتەوە.
