ڕۆژی سێشەمە ٩ی گەلاوێژی ١٤٠٣، هێزە ئەمنیەکانی بۆکان، “ئەحمەد حەسەن زادە و سۆڵماز حەسەن زادە” باوک و خوشکی گیانبەختکردووی شۆڕشی ژینا “محەمەد حەسەن زادە” دەستبەسەرکرد.
بەپێی ڕاپۆرتی کۆڵبەرنیوز هێزە ئەمنیەکانی ڕژیم لە شاری بۆکان، ڕۆژی سێشەمە ٩ی گەلاوێژی ١٤٠٣، هێرشیان کردە سەر ماڵی “ئەحمەد حەسەن زادە” ناوبراو و کچەکەی “سۆڵماز حەسەن زادە” بەبێ بڕیاری دادگا دەستبەسەرکرد.
بەپێی ئەم ڕاپۆرتە هێزە ئەمنیەکانی ڕژیم لە کاتی هێرش بۆ سەر ماڵی ئەحمەد حەسەن زادە و دەستبەسەرکرانی ناوبراو و کچەکەی، بە توندوتیژی هێرشیان کردووە و “دایە عەزیمە” دایکی گیانبەختکردووی ڕێگای ئازادی و شۆڕشی ژینا “محەمەد حەسەن زادە” برینداربوو و ناوبراو ئێستا لە نەخۆشخانەی قەلی زادەی بۆکان خەوێندراوە.
هەروەها هێزە ئەمنیەکانی ڕژیم کەرەستەی تایبەتی وەکو تەلەفون و کامێرای ماڵی ناوبراو و ماڵەکانی دراوسێیان بردووە.
“محەمەد حەسەن زادە” ڕۆژی ٢٥ی خەزەڵوەری ١٤٠١ و لە ماوەی شۆڕشی ژینا لە شاری بۆکان، بە گوللەی هێزەکانی سەرکوتکەری ڕژیم گیانی بەختکرد.
