کرێکارێکی کارگەی لوولە پلی ئاتیلن، بەهۆی کەوتنەخوارەوەی دەزگای بەرزکەرەوە گیانی لەدەستداوە.
بەپێی ڕاپۆرتی کۆڵبەرنیوز، ڕۆژی شەممە ١٠ خەزەڵوەری ١٤٠٤، سەید تاهیر دادوەر، کرێکاری کارگەی لوولە پلی ئاتیلن، بەهۆی کەوتنەخوارەوەی دەزگای بەرزکەرەوە گیانی لەدەستدا. ئەم ڕووداوە کارەساتبارە لە کارگەیەکی شاری پیشەسازی بۆکان ڕوویداوە.
بەگوتەی سەرچاوەکانی ناوخۆیی، سەید تاهیر دادوەر لە کرێکارانی بەئەزموونی ئەم کارگەیە بووە و تەنیا ٢٠ ڕۆژ تا خانەنشینبوونی مابوو. هێشتا ناوەڕۆکی زیاتر لە چۆنێتی ڕوودانی ڕووداوەکە و دۆخی ئەمنی شوێنی کار لەلایەن ناوەندەکانی بەرپرسەوە ڕانەگەیەندراوە.
شایانی باسە؛ لە ساڵی ١٤٠٣، لانیکەم ٢٠٤٢ کرێکار بەهۆی ڕووداوەکانی کار گیانیان لەدەستداوە و لانیکەم ١٦١١٣ کرێکار بەهۆی ڕووداوەکانی کار برینداربوون.
ئێران لە بواری ئەمنییەتی کار لەنێو وڵاتانی جیهاندا پلەی ١٠٢ی هەیە کە پلەیەکی زۆر لەخوارەوەیە.
