ڕۆژی چوارشەممە ١٨ی گەلاوێژی ١٤٠٢، فەرهاد نەوایی، خوێندکاری تەمەن ١٦ ساڵی خەڵکی شاری مەهاباد، پاش نزیک به ٩ مانگ زیندان، لە چاکسازیی ورمێ ئازاد کرا.
بە پێی ڕاپۆرتی کۆڵبەرنیوز، فەرهاد نەوایی، لاو و خوێندکاری تەمەن ١٦ ساڵی خەڵکی شاری مەهاباد، ڕۆژی چوارشەممە ١٨ی گەلاوێژی ١٤٠٢ لە ناوەندی چاکسازیی ورمێ ئازاد کرا. ئەم خوێندکارە تەمەن ١٦ ساڵە، لە ناوەڕاستی مانگی پووشپەڕی ئەمساڵدا، پاش هەشت مانگ لە دەستبەسەرکردنی، لە لایەن دادگای تایبەتی تاوانەکانی نەوجەوانانی پارێزگای ئازەربایجانی ڕۆژئاوا لە شاری مەهاباد بە تۆمەتی “پێکهێنانی تاقم و گرووپ لە دژی ئاسایشی ناوخۆی وڵات”. سزای دەستبەسەرکردنی بەسەردا سەپێندرا.
جێگای ئاماژەیە کە فەرهاد نەوایی لە کاتی دەستبەسەرکردن و لە کاتی دانیشتنی دادگادا مافی هەبوونی پارێزەری دیاریکراوی لێ زەوت کراوە. کەناڵی ئەنجوومەنی هاوئاهەنگی ڕێکخراوە پیشەیی و فەرهەنگییەکانی ئێران بڵاویکردەوە، هێزە ئەمنییەکان لە کاتی دەستبەسەرکردنیدا پەنایان بۆ بەکارهێنانی ئەشکەنجە بردووە و فەرهادیان ناچار کردووە دانپێدانانی زۆرەملێ بکات.
فەرهاد نەوایی، خوێندکاری تەمەن ١٦ ساڵ خەڵکی گوندی تەرشکانی سەر بە شاری مەهاباد، لە ٢٧ی خەزەڵوەری ١٤٠١ لە کاتی ڕاپەڕینی شۆڕشی ژینادا، لە گوندەکەی خۆی لە لایەن هێزە ئەمنییەکانەوە دەستبەسەر و بۆ ناوەندی چاکسازیی ورمێ ڕاگوێزرا.
