کۆڵبەرێکی خەڵکی بانە بە تەقەی هێزەکانی هەنگی مەرزی لە سنووری هەنگەژاڵ-بانە بریندارکرا.
بە پێی ڕاپۆرتی کۆڵبەرنیوز، چوارشەممە ١٨ ڕێبەندانی ١٤٠٢، هێزەکانی هەنگی مەرزی تەقەیان لە کۆڵبەرێک لە سنووری هەنگەژاڵ کردووە و لە ئەنجامدا قاچی بە سەختی بریندار بووە. ناسنامەی کۆڵبەرە بریندارەکە “ئەیوب مەحمودی”، ٣٥ ساڵ و خەڵکی بانە ڕاگەیەندراوە.
بە پێی ڕاپۆرتەکە و بە وتەی ئەیوب مەحمودی، هێزەکانی ڕژێم بەم کۆڵبەرەیان ڕاگەیاندووە کە هیچ پەیوەندییەکیان پێوە نییە و دەتوانێ بەردەوام بێت لە ڕێگاکەی، بەڵام کاتێک بەلای ئەواندا تێدەپەڕێت و تەنیا دوای ئەوەی چەند مەترێک بە پێ دەڕوات، تەقە لەم کۆڵبەرە دەکەن لە پشتەوە، کە قاچی بە سەختی بریندار بووە.
بەپێی ئەو ئامارانەی ٢٠٢٣ لە کۆڵبەرنیوز تۆمارکراون، ٢٩٩ کۆڵبەر لە سنورەکان و ڕێگای نێوان پارێزگاکانی ئازەربایجانی ڕۆژئاوا، کوردستان و کرماشان بە هۆکارەکانی وەک تەقەی ڕاستەوخۆی هێزەکانی ڕژێم، هەرەسی ڕەنوو، بەستەڵەک، کەوتنە سەر مین، کەوتنە خوار لە شاخ و بەرزایی و حاڵەتی دیکە کوژران و بریندار بوون. لەم ژمارەیە ٣٢ کۆڵبەر (١١%) کوژران و ٢٦٧ کۆڵبەر (٨٩%) بریندار بوون. لە گشتیدا ٢٩٩ کۆڵبەر کە کوژران و بریندار بوون، ٢٦١ حاڵەت (٨٧%) بە تەقەی ڕاستەوخۆی هێزەکان بووە. لە گشتیدا ٢٩٩ کۆڵبەر کە کوژران و بریندار بوون، ٣٠ لەوانە منداڵی خوار ١٨ ساڵن.
