تەنها لەماوەی نۆ ڕۆژی ڕابردوودا لانیکەم ٢٣ کۆڵبەر لە ناویاندا ٢ منداڵی کۆڵبەری خوار تەمەن هەژدە ساڵ لە ناوچە سنوورییەکانی کوردستان کوژراون و برینداربوون.
بەپشتبەستن بەو ئامارەی لە کۆڵبەرنیوز تۆمار کراوە، لە ١١ی ڕێبەندان تا ١٩ی ڕێبەندانی ١٤٠٢، بە گشتی ٢٣ کۆڵبەر لە ناویاندا ٢ منداڵی کۆڵبەری خوار تەمەن ١٨ ساڵ، لە ناوچە سنوورییەکانی کوردستان بەهۆی هۆکارەکانی وەک تەقەی ڕاستەوخۆی هێزە سەربازییەکانی ڕژیم، لێدان و ئازاردان لەلایەن هێزە سەربازییەکانی ڕژیم، سەرما بردووییەوە کوژراون و بریندار بوون.
لەم کۆی گشتییە ٢ کۆڵبەر کوژراون و ٢١ کۆڵبەری دیکەش برینداربوون.
لە کۆی گشتی ٢٣ کۆڵبەری کە کوژراون و بریندار بوون، ١٩ حاڵەت (٨٣%) بەهۆی تەقەی ڕاستەوخۆی هێزە سەربازییەکان بووە.
جێگای ئاماژەیە کە زۆربەی حاڵەتەکان لە ناوچە سنوورییەکانی هەنگەژاڵ-بانە (١٣ حاڵەت)، نەوسوود (٥ حاڵەت)، شاهۆ (٣ حاڵەت) و مەریوان (١ حاڵەت) ڕوویانداوە.
ئەمە لە کاتێکدایە کە بەپشتبەستن بەو ئامارانەی لە ساڵی ٢٠٢٣ی زایینیدا لە کۆڵبەرنیوز تۆمارکراون، بە گشتی ٢٩٩ کۆڵبەر کوژراون و بریندار بوون. لە کۆی گشتی ٢٩٩ کۆڵبەری کە کوژراون و بریندار بوون، ٢٦١ حاڵەت (٨٧%) بەهۆی تەقەی ڕاستەوخۆی هێزە سەربازییەکان بووە. لە کۆی گشتی ٢٩٩ کۆڵبەری کە کوژراون و بریندار بوون، ٣٠ کەسیان منداڵی خوار ١٨ ساڵن.
