پێنج کۆڵبەری خەڵکی شارەکانی سەلاس باوەجانی، پاوە و داڵاهۆ بەهۆی تەقەی ڕاستەوخۆی هێزەکانی هەنگی مەرزی برینداربوون.
بەپێی ڕاپۆرتی کۆڵبەرنیوز، ڕۆژی سێشەممە ٧ی خاکەلێوەی ١٤٠٣، هێزەکانی هەنگی مەرزی لە هێڵێ سنووری نەوسوود تەقەیان لە کۆمەڵێک لە کۆڵبەران کردوو و لە ئەنجامدا پێنج کۆڵبەر برینداربوون.
ناسنامەی کۆڵبەرەکان بریتین لە “مەتین حوسێنی” خەڵکی گوندی “سریاس”ی شاری پاوە، “ئێحسان نەزەری” خەڵکی داڵاهۆ، “محەمەد مەحمودی”، “محەمەد یوسفی” و “یاسین”، هەر سێکیان خەڵکی سەلاس باوەجانین. بەپێی ئەم ڕاپۆرتە، ئێحسان نەزەری قاچی بریندار بووە و باری تەندروستی کۆڵبەرێکی دیکەش بە ناجێگیر ڕاگەیەندراوە.
بە پشتبەستن بەو ئامارانەی لە ساڵی ١٤٠٢ی هەتاوی لە کۆڵبەرنیوز تۆمارکراون، بە گشتی ٤٤٤ کۆڵبەر لە ناوچە سنووریەکان و ڕێگاکانی نێوان پارێزگاکانی ئازەربایجانی ڕۆژئاوا، کوردستان و کرماشان بەهۆی هۆکارەکانی وەک تەقەی ڕاستەوخۆی هێزە سەربازییەکانی ڕژیم، ڕنو و سەرمابردوویی، چوونە سەرمین، کەوتنەخوارەوە لە شاخ و بەرزایی، کوژراون و برینداربوون. لەکۆی ئەم ژمارەیە بە گشتی ٤٤ کۆڵبەر کە دەبێتە (١٠%) کوژراون و ٤٠٠ کۆڵبەر کە دەبێتە (٩٠%) برینداربوون. لە کۆی گشتی ٤٤٤ کۆڵبەری کە لە ساڵی ١٤٠٢ کوژران و برینداربوون، بەگشتی ٣٧٣ حاڵەت کە دەبێتە (٨٤%) بەهۆی تەقەی ڕاستەوخۆی هێزە سەربازییەکان بووە.
هەروەها لە کۆی گشتی ٤٤٤ کۆڵبەری کە لە ساڵی ١٤٠٢ لە سنووری کوردستان کوژران و بریندار بوون، ٣٧ کەسیان منداڵی خوار تەمەن ١٨ ساڵن.
لە ساڵی ١٤٠٢دا ئێمە شایەتی بەرزبوونەوەی ٩٠٪ی کوژران و برینداربوونی کۆڵبەران لە سنوورەکانی کوردستان بووین.
