ڕۆژی چوارشەممە ٢٩ی خاکەلێوەی ١٤٠٣، گەنجێکی کۆڵبەری خەڵکی شاری سەقز، لە کاتی ڕاوەدوونانی کۆڵبەران لەلایەن هێزە سەربازییەکانی ڕژیمەوە “قاچی” بریندار بوو.
بەپێی ڕاپۆرتی کۆڵبەرنیوز، هێزە سەربازییەکانی ڕژیم لە سنووری بانە، دەستیان کردووە بە ڕاوەدوونانی کۆمەڵێک لە کۆڵبەران، کە لە ئەنجامدا کۆلبەرێک بە ناسنامەی “محەمەد ڕەحیمی” بەهۆی کەوتنە سەر زەوی لە کاتی ڕاکردندا قاچی بریندار بووە.
جێگای ئاماژەیە کە پێشتر کۆڵبەرنیوز هەواڵێکی لەبارەی بێسەروشوێنبوونی کۆڵبەرێک بۆ ماوەی ٤٨ کاتژمێر بڵاوکردبۆوە. ئەم کۆڵبەرە دوای برینداربوونی قاچی،
بۆ ماوەی ٤٨ کاتژمێر نەیتوانی کە لە ناوچە سنوورییەکان بگەڕێتەوە.
بە پشتبەستن بەو ئامارانەی لە ساڵی ١٤٠٢ی هەتاوی لە کۆڵبەرنیوز تۆمارکراون، بە گشتی ٤٤٤ کۆڵبەر لە ناوچە سنووریەکان و ڕێگاکانی نێوان پارێزگاکانی ئازەربایجانی ڕۆژئاوا، کوردستان و کرماشان بەهۆی هۆکارەکانی وەک تەقەی ڕاستەوخۆی هێزە سەربازییەکانی ڕژیم، ڕنو و سەرمابردوویی، چوونە سەرمین، کەوتنەخوارەوە لە شاخ و بەرزایی، کوژراون و برینداربوون. لەکۆی ئەم ژمارەیە بە گشتی ٤٤ کۆڵبەر کە دەبێتە (١٠%) کوژراون و ٤٠٠ کۆڵبەر کە دەبێتە (٩٠%) برینداربوون. لە کۆی گشتی ٤٤٤ کۆڵبەری کە لە ساڵی ١٤٠٢ کوژران و برینداربوون، بەگشتی ٣٧٣ حاڵەت کە دەبێتە (٨٤%) بەهۆی تەقەی ڕاستەوخۆی هێزە سەربازییەکان بووە.
هەروەها لە کۆی گشتی ٤٤٤ کۆڵبەری کە لە ساڵی ١٤٠٢ لە سنووری کوردستان کوژران و بریندار بوون، ٣٧ کەسیان منداڵی خوار تەمەن ١٨ ساڵن.
لە ساڵی ١٤٠٢دا ئێمە شایەتی بەرزبوونەوەی ٩٠٪ی کوژران و برینداربوونی کۆڵبەران لە سنوورەکانی کوردستان بووین.
