ئەمین بازیان و وەیسە، دوو هاوڵاتیی خەڵکی شاری پیرانشار، لەلایەن هێزە ئەمنییەکانی ئەو شارەوە دەستبەسەر کران و بۆ شوێنێکی نادیار گوازرانەوە.
بە پێی ڕاپۆرتی کۆڵبەرنیوز، ڕۆژی شەممە ٨ی بەفرانباری ساڵی ١٤٠٣، وەیسە ناسراو بە «سایکۆ ڕۆژ» تەمەن ٢٥ ساڵ و خەڵکی پیرانشار لە لایەن هێزە ئەمنییەکانەوە دەستبەسەر کرا و بۆ شوێنێکی نادیار گوازرایەوە. هاوکات بەپێی هەواڵێکی دیکە، ڕۆژی هەینی ٧ی بەفرانبار، ئەمین بازیان، هاوڵاتی تەمەن ٢٢ ساڵانی خەڵکی شاری پیرانشار، لەلایەن هێزە ئەمنییەکانەوە دەستبەسەر کراوە و بۆ شوێنێکی نادیار ڕاگوێزراوە.
بە دەستبەسەرکرانی ئەو دوو هاوڵاتییە، ژمارەی دەستبەسەرکراوانی شاری پیرانشار لە ماوەی چەند ڕۆژی ڕابردوودا گەیشتە شەش کەس.
پێشتر کۆڵبەرنیوز هەواڵی دەستبەسەرکردنی چوار هاوڵاتیی دیکەی بە ناوەکانی ئارام محەممەدی و بێهزاد مەحموودی تەمەن ٢٧ ساڵ و هەردووک خەڵکی گوندی “پەسوێ”ی سەر بە پیرانشار، مووسا ڕەسووڵی، تەمەن ٣٠ ساڵ و خەڵکی گوندی “خورینج”ی سەر بە پیرانشار و سۆران محەممەدپوور، تەمەن ٢٥ ساڵ و خەڵکی پیرانشار لە پاش هێرشی هێزەکانی ئیدارەی ئیتلاعات بۆ سەر ماڵی ئەم هاوڵاتیانە، بڵاو کردبۆوە.
تا ئامادەکردنی ئەم ڕاپۆرتە هیچ زانیارییەک لەبارەی هۆکار و شوێنی دەستبەسەرکران و ئەو تۆمەتانەی ئاراستەی ئەم هاوڵاتیانە کراون لەبەردەستدا نییە.
