“بەهمەن مەعروفی نەژاد”، کۆڵبەرێکی گەنجی تەمەن ١٩ ساڵ، بەهۆی تەقەی هێزەکانی هەنگی مەرزیەوە لە سنووری هەنگەژاڵی بانە بریندار بوو.
بەپێی ڕاپۆرتی کۆڵبەرنیوز، ئێوارەی ڕۆژی شەممە ٤ ی سەرماوەزی ١٤٠٢، “بەهمەن مەعروفی نەژاد” کۆڵبەرێکی گەنجی ١٩ ساڵ ، بە تەقەی ڕاستەخۆ لەلایەن هێزەکانی هەنگی مەرزیەوە بە سەختی بریندار بوو.
بەپێی ئەم ڕاپۆرتە، ناسنامەی ئەم کۆڵبەرە “بەهمەن مەعروفی نەژاد”ە و تەمەنی ١٩ ساڵە. بەهۆی پێکرانی بە فیشەکێکەوە لە قاچیدا بە سەختی بریندار بووە.
بەپشتبەستن بەو ئامارەی لە ماوەی دوو مانگی ڕابردوودا لە کۆڵبەرنیوز تۆمارکراوە، لە ١ی ڕەزبەر تا ١ ی سەرماوەزی ١٤٠٢، بەگشتی ١٥٤ کۆڵبەر لە ناوچە سنوورییەکانی کوردستان بەهۆی هۆکارەکانی وەک تەقەی ڕاستەوخۆی هێزەکانی هەنگی مەرزی، لێدان و ئازاردان لەلایەن هێزە سەربازییەکانی ڕژێم و کەوتنە سەر مین. کوژراو و بریندار بوون.
لەم ژمارەیە بەگشتی ٩ کۆڵبەر کوژراون و ١٤٥ کۆڵبەر برینداربوون. لە کۆی گشتی ١٥٤ کۆڵبەر کە کوژراون و برینداربوون، ١٤١ حاڵەت (٩٢%) بەهۆی تەقەی ڕاستەوخۆی هێزە سەربازییەکان بووە.
