شەوی یەکشەممە ١٧ی بەفرانباری ١٤٠٢ لە ئەنجامی بۆسە و تەقەی پاسەوانانی سنووری ڕژیم، کۆڵبەرێک لە سنووری هەنگەژاڵی بانە بریندار بوو.
بەپێی ڕاپۆرتی کۆڵبەرنیوز، ئەم کۆڵبەرە بریندارە کە ناسنامەی “حامید” تەمەن ٣٥ ساڵ و خەڵکی شاری شاهیندژە، بەهۆی بەرکەوتنی گوللەی ساچمەیی بەر “دەست”ی بریندار بووە.
پێشتریش کۆڵبەرنیوز لە ڕاپۆرتێکی دیکەدا، برینداربوونی دوو کۆڵبەری دیکەی بە ناوەکانی “تە گۆڵمحەممەدی” و “ڕەزا حوسنی”، هەردووکیان خەڵکی سەقز، لە ڕۆژانی شەممە و یەک شەممە ١٦ و ١٧ بەفرانباری ١٤٠٢ بڵاوکردبۆوە.
بەپشتبەستن بەو ئامارەی لە ماوەی دوو مانگی ڕابردوودا لە کۆڵبەرنیوز تۆمارکراوە، لە ١ی ڕەزبەر تا ١ ی سەرماوەزی ١٤٠٢، بەگشتی ١٥٤ کۆڵبەر لە ناوچە سنوورییەکانی کوردستان بەهۆی هۆکارەکانی وەک تەقەی ڕاستەوخۆی هێزەکانی هەنگی مەرزی، لێدان و ئازاردان لەلایەن هێزە سەربازییەکانی ڕژێم و کەوتنە سەر مین. کوژراو و بریندار بوون.
لەم ژمارەیە بەگشتی ٩ کۆڵبەر کوژراون و ١٤٥ کۆڵبەر برینداربوون. لە کۆی گشتی ١٥٤ کۆڵبەر کە کوژراون و برینداربوون، ١٤١ حاڵەت (٩٢%) بەهۆی تەقەی ڕاستەوخۆی هێزە سەربازییەکان بووە.
