ئێوارەی دووشەمە ١٤ ڕەشەمەی ١٤٠٢, هێزەکانی هەنگی مەرزی ڕژێم لە هێڵی سنووری هەنگەژاڵی بانە،تەقەیان لە کۆمەڵێک کۆڵبەر کرد و لە ئەنجامدا دوو کۆڵبەر برینداربوون.
بەپێی ڕاپۆرتی کۆڵبەرنیوز، بە تەقەی ڕاستەوخۆی هێزەکانی هەنگی مەرزی ڕژێم لە بانە دوو کۆڵبەر برینداربوون کە ناسنامەی یەکێکیان بە ناوی «فەخرەدین یوسفی» بۆ کۆڵبەرنیوز ڕاگەیەندراوە و ناسنامەی کۆڵبەرەکەی دیکە لە لێکۆڵینەوە دایە.
ئەم ڕاپۆرتە لە کاتێکدایە کە ئەم کۆڵبەرانە بە مەبەستی چارەسەر بۆ نەخۆشخانەی «سەڵاحەدین ئەیوبی» لە شاری بانە گوازراونەتەوە بەڵام «فەخرەدین یوسفی» بەهۆی سەختی برینەکانی بۆ نەخۆشخانەی «تاڵقانی» لە شاری کرماشان گوازرایەوە.
بەپێی ئەو ئامارانەی ٢٠٢٣ لە کۆڵبەرنیوز تۆمارکراون، ٢٩٩ کۆڵبەر لە سنورەکان و ڕێگای نێوان ئازەربایجانی ڕۆژئاوا، کوردستان و کرماشان بە هۆکاری وەک تەقەی ڕاستەوخۆی هێزەکانی ڕژێم، هەرەسی ڕەنوو، بەستەڵەک، کەوتنە سەر مین، کەوتنە خوار لە شاخ، بەرزایی و حاڵەتی دیکە کوژران و بریندار بوون. لەم ژمارەیە ٣٢ کۆڵبەر (١١%) کوژران و ٢٦٧ کۆڵبەر (٨٩%) بریندار بوون. بە گشتی ٢٩٩ کۆڵبەر کە کوژران و بریندار بوون، ٢٦١ حاڵەت (٨٧%) بە تەقەی ڕاستەوخۆی هێزەکان بووە. بە گشتی ٢٩٩ کۆڵبەر کە کوژران و بریندار بوون، ٣٠ لەوانە منداڵی خوار ١٨ ساڵن.
