مورتەزا محەممەدی و ئیبراهیم محەممەدی دوو برای خەڵکی شاری سنە بە دانانی بارمتە بەشێوەیەکی کاتی لە زیندانی ناوەندیی ئەم شارە ئازاد کران.
بەپێی ڕاپۆرتی کۆڵبەرنیوز، ڕۆژی یەکشەممە ڕێکەوتی ١٧ی بەفرانباری ١٤٠٢، مورتەزا محەممەدی و ئیبراهیم محەممەدی دوو برای خەڵکی شاری سنە، بە دانانی بارمتە تا کۆتایی پرۆسەی دادگا، بە شێوەی کاتی لە زیندانی ناوەندیی ئەم شارە ئازاد کران.
تا کاتی نووسینی ئەم ڕاپۆرتە هیچ زانیارییەک لەبارەی ئەو تۆمەتانەی کە ئاراستەیان کراوە، لەبەردەستدا نییە.
ڕۆژی ١١ی بەفرانبار مورتەزا محەممەدی و ئیبراهیم محەممەدی، خەڵکی شاری سنە لەلایەن هێزەکانی ئیدارەی ئیتلاعاتی ئەم شارەوە دەستبەسەر و بۆ گرتووخانەی ئیدارەی ئیتلاعاتی شاری سنە ڕاگوێزران. دوای تەواو بوونی پرۆسەی لێپرسینەوە بۆ زیندانی شاری سنە گواسترانەوە.
جێگای ئاماژەیە کە هێزەکانی ئیتلاعات لە کاتی دەستگیرکردنی مورتەزا محەمەدی دەرگا و پەنجەرەی ماڵەکەی ناوبراویان شکاندووە و شوێنەکەیان پشکنیوە. هەروەها دەستیان بەسەر ژمارەیەک لە کەلوپەلی ئەندامانی خێزانەکەیدا بە تایبەت مۆبایل و لاپتۆپدا گرتووە.
