منداڵيکی کۆڵبەر بەهۆی بارینی بەفر و سەرما لە سنوری (میشاوی سەقز) گیانی لەدەستدا.
بەپێی ڕاپۆرتی کۆڵبەرنیوز ؛ ئێوارەی یەکشەممە ٥ی خاکەلێوەی ١٤٠٣، منداڵێکی کۆڵبەر بە ناوی (هەستیار عەبدولکەریمی) تەمەن ١٥ ساڵ و خەڵکی شاری دیواندەرە لە سنووری (میشاوی سەقز) بەهۆی بارینی بەفر و سەرما گیانی لەدەستدا.
بەپێی ئەم ڕاپۆرتە، بەیانی ئەمڕۆ دووشەمە ٦ی خاکەلێوەی ١٤٠٣، تەرمی ئەم منداڵە کۆڵبەرە دۆزراوەتەوەر و بۆ نەخۆشخانەیەکی سەقز گوازرایەوە. لە هەمان کاتدا ئێوارەی یەکشەممە ٥ی خاکەلێوەی ١٤٠٣، بەهۆی تەقەی ڕاستەوخۆی هێزەکانی هەنگی مەرزی منداڵێکی دیکەی کۆڵبەر لە مەریوان، شان و پشتیبە سەختی بریندارکرا، ناسنامەی ئەم کۆڵبەرە (میلاد حوسێنی) تەمەن ١٦ ساڵ و خەڵکی شاری دیواندەرەیە.
بە پشتبەستن بەو ئامارانەی لە ساڵی ١٤٠٢ی هەتاوی لە کۆڵبەرنیوز تۆمارکراون، بە گشتی ٤٤٤ کۆڵبەر لە ناوچە سنووریەکان و ڕێگاکانی نێوان پارێزگاکانی ئازەربایجانی ڕۆژئاوا، کوردستان و کرماشان بەهۆی هۆکارەکانی وەک تەقەی ڕاستەوخۆی هێزە سەربازییەکانی ڕژیم، ڕنو و سەرمابردوویی، چوونە سەرمین، کەوتنەخوارەوە لە شاخ و بەرزایی، کوژراون و برینداربوون. لەکۆی ئەم ژمارەیە بە گشتی ٤٤ کۆڵبەر کە دەبێتە (١٠%) کوژراون و ٤٠٠ کۆڵبەر کە دەبێتە (٩٠%) برینداربوون. لە کۆی گشتی ٤٤٤ کۆڵبەری کە لە ساڵی ١٤٠٢ کوژران و برینداربوون، بەگشتی ٣٧٣ حاڵەت کە دەبێتە (٨٤%) بەهۆی تەقەی ڕاستەوخۆی هێزە سەربازییەکان بووە.
هەروەها لە کۆی گشتی ٤٤٤ کۆڵبەری کە لە ساڵی ١٤٠٢ لە سنووری کوردستان کوژران و بریندار بوون، ٣٧ کەسیان منداڵی خوار تەمەن ١٨ ساڵن.
لە ساڵی ١٤٠٢دا ئێمە شایەتی بەرزبوونەوەی ٩٠٪ی کوژران و برینداربوونی کۆڵبەران لە سنوورەکانی کوردستان بووین.
