لە دوو حەوتووی ڕابردوودا لانیکەم ٤٨ کۆڵبەر لە سنوورەکانی کوردستان کوژراو و بریندار بوون.
بەپێی زانیارییەکانی کۆڵبەرنیوز، لە ١١ بۆ ٢٤ی ڕەشەمەی ١٤٠٢ لانیکەم ٤٨ کۆڵبەر لە سنوورەکانی کوردستان بە تەقەی ڕاستەوخۆ، لێدان، کەوتنە خوارەوە لە بەرزاییەوە، ڕووداوی هاتوچۆ، ڕاونان و تەقینەوەی مین کوژراو و بریندار بوون.
بەپێی هەواڵەکە، لە ٤٨ کۆڵبەر، ٥ کۆڵبەر کوژراو و ٤٣ کۆڵبەریش بریندار بوون.
«عەلی زەرغامی» کۆڵبەری هاوڵاتی تیکاب لە ١٣ی ڕەشەمە لە سنوری سەرشێوی سەقز بە تەقەی ڕاستەوخۆی هێزەکانی ڕژێم کوژرا. هەروەها «ئارام مەنوچەهری» و «سەیوان باتر» دوو کۆڵبەری مەریوانی لە ڕووداوی هاتوچۆی ئۆتۆمبێل لەدوای ڕاونان و تەقەی هێزەکانی ڕژێم لە ١٩ی ڕەشەمە گیانیان لە دەست دا.
١٦ی ڕەشەمە بە تەقەی هێزەکانی ڕژێم لە سنوری نەوسود کۆڵبەرێک بە ناسنامەی «عەتا حسێنی» تووشی وەستانی مێشک بوو و لە ٢٤ی ڕەشەمە گیان لە دەست دا.
لە ڕووداوێکی تراژیکی تردا «محەمەد گەنجە» کۆڵبەری هاوڵاتی پیرانشار، لە سنوری شارەکە لەگەڵ هەرێمی کوردستان هێزەکانی ڕژێم تەقەیان لێکرد و لە ٢١ی ڕەشەمە گیانی دا، جەستەی ناوبراو لەژێر بەفردا شاردرا بوویەوە و دوای ٢ ڕۆژ گەڕان لە ٢٣ی ڕەشەمە لەلایەن هاوڵاتیانەوە دۆزرایەوە.
هاوکات ٢٩ کۆڵبەر بە تەقەی ڕاستەوخۆی هێزەکانی ڕژێم، ٧ کۆڵبەر بە لێدان و تەقەی ڕاستەوخۆی هێزەکانی عێراق «پاسەوانی سنور»، ٣ کۆڵبەر بە لێدان و بەردباران کردن لەلایەن هێزەکانی ڕژێم، ٢ کۆڵبەر بە تەقینەوەی مین و ٢ کۆڵبەر بە ڕووداوی هاتوچۆ و ڕاونانی هێزەکانی ڕژێم بریندار بوون.
منداڵێکی کۆڵبەری دیکەش بە ناسنامەی «دیاکۆ محەمەدی» ١٧ ساڵە و هاوڵاتی دیواندەرە لە نێوان ئەم ٢٩ کۆڵبەرە بریندارەدایە کە بە تەقەی ڕاستەوخۆی هێزەکانی ڕژێم بریندار بوون.
