حەمید عەزیزی هاوڵاتییەکی خەڵکی شاری کامێران و مامۆستای گوندەکانی گازرخانی و پاڵنگانی سەر بەم شارە، لەلایەن هێزە ئەمنییەکانەوە دەستبەسەر کرا و بۆ شوێنێکی نادیار گوازرایەوە.
بە پێی ڕاپۆرتی کۆڵبەرنیوز، ڕۆژی سێشەممە ١٣ی سەرماوەزی ساڵی ١٤٠٣، حەمید عەزیزی، مامۆستا لە گوندەکانی “گازرخانی” و “پاڵنگان”ی سەر بە شاری کامێران، دوای بانگهێشتکرانی بۆ بنکەی ئەمنییەتی بەشی پەروەردەی ئەم شارە، دەستبەسەر کرا و بۆ شوێنێکی نادیار گوازرایەوە. وێڕای تێپەڕبوونی چوار ڕۆژ بەسەر دەستگیرکردنی ناوبراودا، هەوڵەکانی بنەماڵەی بۆ ئاگادار بوون لە چارەنووسی ئەم هاوڵاتییە بێ ئەنجام ماونەتەوە.
حەمید عەزیزی دەرچووی دکتۆرایە لە زانستەکانی پەیوەندی و ڕاگەیاندن لە زانکۆی عەلامە تەباتەبایی لە تاران.
تا ئامادەکردنی ئەم ڕاپۆرتە هیچ زانیارییەک لەبارەی هۆکاری دەستگیرکران، شوێنی دەستبەسەرکردن و ئەو تۆمەتانەی ئاراستەی ئەم هاوڵاتییە کراون لەبەردەستدا نییە.
