داوای دادگاییکردنەوەی دۆسیەی ڕێحانە ئەنساری نەژاد، چالاکی کرێکاری زیندانیکراو لە زیندانی ئێڤین، لەلایەن دیوانی باڵای وڵات پەسەندکرا و دۆسیەی ناوبراو بۆ لقی هاوشێوە نێردرایەوە.
بەپێی ڕاپۆرتی کۆڵبەرنیوز بە وەرگرتنی لە هێرانا، داوای دادگاییکردنەوەی دۆسیەی ڕێحانە ئەنساری نەژاد، چالاکی کرێکاری و ئەندامی کۆمیتەی هەماهەنگی بۆ هاوکاری ڕێکخراوە کرێکارییەکان، زیندانیکراو لە زیندانی ئێڤین پەسەندکرا.
حسێن تاج، پارێزەری دادگا دوێنێ دووشەمە ٢٧ی ڕەشەمەی ١٤٠٣، لە بڵاوکردنەوەی ئەم هەواڵەدا نووسیویەتی؛ دیوانی باڵای وڵات داوای دادگاییکردنەوەی خاتوو ڕێحانە ئەنساری نەژادی پەسەندکردووە. دۆسیەی ناوبراو ئێستا بۆ پێداچوونەوەی دووبارە بۆ لقی هاوشێوە نێردراوەتەوە.
ڕێحانە ئەنساری نەژاد، لە گوڵانی ١٤٠٢، لە ڕۆژی جیهانی کرێکاردا لەگەڵ ژمارەیەک لە چالاکانی سنفی و کرێکاری لەلایەن هێزە ئەمنییەکانەوە لە ماڵی محەمەد حەبیبی، چالاکی سنفی مامۆستایان، دەستبەسەر و پاش چەندین ڕۆژ بە دانانی بارمتەی یەک ملیارد تمەن لە زیندانی ئێڤین ئازادکرا.
خاتوو ئەنساری نەژاد، لە گەلاوێژی ١٤٠٢، لەلایەن لقی ١٥ی دادگای شۆڕشی تاران بە سەرۆکایەتی دادوەر «ئەبوقاسم سەڵواتی» بە تۆمەتی «گردبوونەوە و پشتگیری بە مەبەستی دژایەتی ئاسایشی وڵات» بە ٤ ساڵ زیندانی تەعزیری سزای بەسەردا سەپێندرا. هەروەها ناوبراو لە سزا تەواوکراوەکاندا بە قەدەغەکردنی ئەندامبوون لە حیزبەکان، کۆمەڵەکان، دەستە سیاسییەکان و چالاکی لە تۆڕە کۆمەڵایەتییەکان، میدیاکان و بڵاوکراوەکان و ڕۆیشتنە دەرەوە لە وڵات بۆ ماوەی ٢ ساڵ سزای بەسەردا سەپێندرا.
ناوبراو لە خەزەڵوەری ١٤٠٢، بۆ تێپەڕاندنی سزای زیندانییەکەی، ڕەوانەی زیندانی ئێڤین کرا.
ڕێحانە ئەنساری نەژاد، چالاکی کرێکاری و لە ئەندامانی کۆمیتەی هەماهەنگی بۆ هاوکاری ڕێکخراوە کرێکارییەکان، پێشتر بەهۆی چالاکییە مەدەنی و کرێکارییەکانی خۆیەوە دەستبەسەر و مامەڵەی یاسایی هەبووە.
