کەیومەرز ڕاستخانە، کۆڵبەری گەنجی شاری مەریوان لە کاتی گەڕان و ڕاونانی لەلایەن هێزەکانی هەنگی مەرزی لە هێڵی سنووری مەریوان برینداربوو.
بەپێی ڕاپۆرتی کۆڵبەرنیوز ڕۆژی چوارشەمە ٣١ی گەلاوێژی ١٤٠٣، کۆڵبەرێک لە کاتی گەڕان و ڕاونانی لەلایەن هێزەکانی هەنگی مەرزی لە هێڵی سنووری مەریوان لە بەرزایی کەوتە خوارەوە و لاقی بە سەختی برینداربوو. ناسنامەی ئەم کۆڵبەرە “کەیومەرز ڕاستخانە” خەڵکی شاری مەریوان بۆ کۆڵبەرنیوز ڕاگەیەندراوە. بەپێی ئەم ڕاپۆرتە ئەم کۆڵبەرە بە سەختی برینداربووە و بۆ چارەسەر بۆ نەخۆشخانەی مەریوان گوازرایەوە.
بە گوێرەی ئامارەکانی کۆڵبەرنیوز، لە نیوەی یەکەمی ٢٠٢٤، ٢٧٠ کۆڵبەر لە ناوچە سنوورییەکان و ڕێگاکانی نێوان پارێزگاکانی ئازەربایجانی ڕۆژئاوا، کوردستان و کرماشان بە هۆکارەکانی وەک تەقەی ڕاستەوخۆی هێزە سەربازییەکانی ڕژیم، سەرما، کەوتنەسەر مین، کەوتنە خوارەوە لە شاخ و بەرزایی و حاڵەتەکانی تر کوژران و برینداربوون. لەم ژمارەیە، ٣٤ کۆڵبەر واتا ١٣٪ کوژران و ٢٣٦ کۆڵبەر واتا ٨٧٪ برینداربوون.
لە ٢٧٠ کۆڵبەر لە نیوەی یەکەمی ٢٠٢٤ کوژران و برینداربوون، ٢٢٢ کۆڵبەر واتا ٨٢٪ بەهۆی تەقەی ڕاستەوخۆ یان لێدان و ئەشکەنجەی هێزەکانی ڕژیمەوە بووە.
هەروەها لە ٢٧٠ کۆڵبەر لە نیوەی یەکەمی ٢٠٢٤ لە سنووری کوردستان کوژران و برینداربوون، ٢٠ کۆڵبەریان منداڵی خوار تەمەن ١٨ ساڵن.
ئاماری نیوەی یەکەمی ٢٠٢٤، بە بەراورد بە نیوەی یەکەمی ٢٠٢٣، ئێمە چاودێری زیادبوونی ٢١٨٪ ڕێژەی کوژراو و برینداربوونی کۆڵبەران لە هێڵی سنووری کوردستان بووین.
