بە ڕاگەیاندنی ناسنامەی چوار هاوڵاتی دیکە بە ناوەکانی بیلال دادڕەس، موحەممەد نیکپەی، ئارام نیکپەی و موحەممەد ئاشتەک، ژمارەی دەستبەسەرکراوانی ڕۆژی هەینی یەکی خاکەلێوەی ١٤٠٤، بۆ لانیکەم ٥ هاوڵاتی بەرز بۆتەوە. ڕۆژی دوێنێ دەستبەسەرکرانی تەحسین دادڕەس ڕاگەیەندرابوو.
بەپێی ڕاپۆرتی کۆڵبەرنیوز، ڕۆژی هەینی یەکی خاکەلێوەی ١٤٠٤، لانیکەم ٥ هاوڵاتی لە شاری مەریوان لەلایەن هێزە ئەمنییەکانەوە دەستبەسەرکراون. ناسنامەی ٤ کەس لەم هاوڵاتییانە بیلال دادڕەس، محەمەد نیکپەی، ئارام نیکپەی و محەمەد ئاشتەک ڕاگەیەندراوە.
دەستبەسەرکرانی بیلال دادڕەس بەبێ بڕیاری دادوەر و لە شوێنی کارەکەی ئەنجامدراوە. هەروەها محەمەد ئاشتەک لەگەڵ محەمەد و ئارام نیکپەی، پاش بانگهێشتکرانی بۆ ئیدارەی ئیتلاعاتی شاری مەریوان دەستبەسەرکراون.
پێشتر دەستبەسەرکرانی هاوڵاتییەک بە ناوی تەحسین دادڕەس لەم ڕۆژەدا ڕاگەیەندرابوو.
لە نێو ئەم کەسانەدا، تەحسین دادڕەس، محەمەد و ئارام نیکپەی، پێشتر بەهۆی هەڵسوڕان و چالاکیەکانیانەوە دەستبەسەر و زیندانی کراون.
تا ئێستا لە شوێنی مانەوە و تۆمەتەکانی دژی ئەم هاوڵاتییانە زانیارییەک لەبەردەستدا نییە.
