بە تێپەڕبوونی ١٧ ڕۆژ لە دەستبەسەرکرانی سەرەرۆیانەی «سینا کیانی»، گەنجی کوردی خەڵکی کرماشان و دانیشتووی تاران، خێزانی ناوبراو هێشتا لە بێ ئاگایی تەواو لەبارەی ناوبراوەوە بەسەردەبەن و بڵاوکردنەوەی ڤیدیۆی دانپێدانانی زۆرەملێ لە میدیا حکومییەکاندا، نیگەرانییەکانی سەبارەت بە ژیان، تەندروستیی جەستەیی و دەروونی و چارەنووسی ئەم گەنجە زیاتر کردووە.
بەپێی ڕاپۆرتی کۆڵبەرنیوز، «سینا کیانی» ٢١ ساڵ، کرێکاری کوردی خەڵکی کرماشان و دانیشتووی تاران، ڕۆژی پێنجشەممە ١٨ی بەفرانباری ١٤٠٤، بەبێ پێشکەشکردنی بڕیاری دادوەر و بە شێوەیەکی تەواو سەرەرۆیانە لەلایەن هێزە ئەمنییەکانەوە دەستبەسەر کراوە و بۆ شوێنێکی نادیار گواستراوەتەوە.
بەپێی سەرچاوەیەکی ئاگادار، لە کاتی دەستبەسەرکرانییەوە تا ئێستا هیچ زانیارییەک لەبارەی شوێنی ڕاگرتن و بارودۆخی ئەم هاوڵاتییە لەبەردەست نییە و لە مافی پەیوەندی تەلەفۆنی، چاوپێکەوتن لەگەڵ بنەماڵەکەی و دەستڕاگەیشتن بە پارێزەر بێبەش کراوە.
ئەم سەرچاوە ئاگادارە هەروەها رایگەیاند کە بنەماڵەی سینا کیانی تەنها لە ڕێگەی بڵاوکردنەوەی ڤیدیۆی دانپێدانانی زۆرەملێ لە کەناڵە حکومییە پەیوەستەکان بە پلاتفۆرمی «ڕووبیکا»وە لە بارودۆخی منداڵەکەیان ئاگادار بوونەتەوە و هەر ئەم مەسەلەیە نیگەرانییەکانی سەبارەت بە بەکارهێنانی فشار، ئەشکەنجە، دیزاینکردنی سیناریۆی ئەمنی و ئەگەری دەرچوونی سزای سەخت دژی ئەم گەنجە کوردە یارسانە زیاتر کردووە.
تا کاتی ئامادەکردنی ئەم ڕاپۆرتە، هیچ دامەزراوەیەکی ئەمنی یان دادوەرانە سەبارەت بە شوێنی ڕاگرتن، بارودۆخی تەندروستی و تاوانەکانی دژی سینا کیانی وەڵامیان نەداوەتەوە.
