«فەرشاد نادری»، هاووڵاتییەکی خەڵکی گەڕەکی «دەرەدرێژ»ی شاری کرماشان، هێشتا لە چارەنووسێکی نادیاردا لە زیندانی دیزڵئاوات ئەم شارەدا ڕاگیراوە و دۆخی یاسایی ناوبراو هێشتا نادیارە.
بەپێی ڕاپۆرتی کۆڵبەرنیوز، ڕۆژی پێنجشەممە ١٨ی بەفرانباری ١٤٠٤، فەرشاد نادری لە کاتی نارەزایەتییە جەماوەرییەکانی کرماشاندا و بەبێ بوونی بڕیاری دادوەری، لەلایەن هێزە ئەمنییەکانەوە دەستبەسەر کرا و دوای تەواوبوونی قۆناغەکانی لێکۆلینەوە، بۆ زیندانی دیزڵ ئاوا گواسترایەوە.
بەپێی زانیارییە بەدەستهاتووەکان، ئەم هاووڵاتییە لە ماوەی دەستبەسەرکرانیەوە تا ئێستا لە مافی دەستگەیشتن بە پارێزەر بێبەش کراوە و هەروەها هیچ ڕێگایەکی بۆ بینینی خێزانەکەی دابین نەکراوە.
فەرشاد نادری ئامۆزای «سینا نادری»یە، یەکێک لە گیانبەختکردووانی بزووتنەوەی شۆڕشگێرانەی ژینایە لە کرماشان، و بەردەوامی دەستبەسەرکرانی ناوبراو لە کاتێکدا ڕوودەدات کە خێزانەکەی نیگەرانیی خۆیان دەربارەی ناڕوونی چارەنووسی و سەپاندنی سنووردارکردنە یاساییەکان لەسەری دەربڕیووە.
